Shillong, Risaw 18: Ka sorkar Meghalaya kala pynmih ia ka jingpynbna sorkar bala pynjari ia ka Administrator Rule hapoh jong ka Garo Hills Autonomous District Council (GHADC) bad la thung ia u Dr Vijay Kumar Commissioner Secretary ka pla tyngka jong ka sorkar kum u Administrator.
Katkum ki lad jingtip kiba u SP News Agency u la ioh na GHADC, la iathuh ba ka jingpynbna sorkar kala poi sha GHADC bad u Dr Vijay Kumar un shimti noh kum u Administrator jong ka GHADC naduh la shai ka sngi ban peit ia ki kam ki jam kiba ia dei man ka Council.
Ka iing dorbar jong ka GHADC kala kut ha ka 15/10/2020 mynta u bnai namar ka jingbym lah ban pynlong ia ka ilekshon sha katei ka iing dorbar jong ka GHADC namar kane ka jingpang COVID-19 ka sorkar kala pynjari noh da ka Administrator Rule bad la thung ia u Dr Vijay kumar ban peit ia ka GHADC haduh ban da pynbna da kumwei pat.