Shillong, Iaiong 16: Ka jingtep don burom ia u Dr John Sailo Ryntathiang la lah ban pyndep mynta ka step ha u lum jingtep ba kyntang jong ka balang Presbyterian jong ka Raitsamthiah kaba don ha Lawmali Shillong.
Ka jingpyndep ia kane ka jingtep don burom ia u Dr Sailo la pyndep da ki bor sorkar katkum ki kyndon kiba la bethah da ka tnad kam poh iing jong ka sorkar pdeng. Ka sorkar jylla kala bud ryntih ia baroh ki kyndon ha kaba pyndep ban pynkhuid ia ka met jong u Dr Sailo.
U Dr Sailo u khlad ha ka 15 tarik mynstep bad na ka liang jong kiba ha iing kila kwah ban thep ha Nongpoh hapoh ka Pham House kaba don ha Nongpoh Proper hynrei ka shnong kam shym la ai jingbit da kaba ai daw ba kane ka jaka ka don ha pdeng jong ka shnong.
Na ka liang jong ka sorkar kala pyrshang ban pyndep katkum ki kyndon jong ka MHA ban thang ha ka jaka thang briew jong ka sorkar ha Jalupara hynrei na ka daw jong ka jingpyrshah ki briew la hap ban pynsangeh.
Ha dien ba la mih kane ka jingwit, ka shnong Mawryngkneng kala wan sha khmat ban tyrwa ban ai jaka bad kumjuh na ka liang jong ka Balang Presbyterian Raitsamthiah, na ka liang jong ka sorkar kala jied ia ka lum jingtep jong ka balang Presbyterian ha Lawmali ha kaba la lah ban tep don burom ia u Dr John Sailo Ryntathiang mynta ka step.
Haba u SP News Agency u la pyrshang ban ioh jingtip na kibor jong ka District administration ym shym la ioh lad ban kren.
