Umdohlun July 28: Ka Joint Action Committee on Two Lanes Roads Nongstoin – Wahkaji – Mawthabah – Phlangdiloin – Ranikor ka la pynpaw ia ka jingsngewkyndit halor ka jingkren u Chief Executive Member (CEM) Bah Pynshngain N Syiem ba la mih ha ki lad pathai khubor bapher bapher da ka ba ong ba um lah ban ai NOC ia ka surok Nongstoin – Wahkaji – Mawthabah namar ka jingpyrshah jong ki katto katne ki briew kiba na bar jong katei ka thain ki bym ioh jingmyntoi nakane ka surok ym na ka jingma jong uta u Uranium.
Kane ka dei ka jingknieh noh ia ka hok longbriew manbriew ban kiew sha ka kyrdan kumba long lem kiwei ki paradoh parasnam ka Bri U hynniewtrep kiba im ha ki jaka sor. Kane kadei ka tynrai jong ka jingiakhih kaba imat ka dei ka jingbishni im-im peit-peit ia ki duk ki suk ki nongkyndong.
Kum u nongialam paidbah ha ka jaka ba dei ban rai na ka bynta ka hok u paidbah, u ai daw pynban ia ka jingpyrshah jong ki katto katne ki khwan mytoi, ha ka jaka ban ai rai ban ai noh ia ka NOC ban pyntrei iaka surok. Hato ki niew iangi ba ngi dei ki nong Pakistan ne ki nong Bangladesh ba ngim lah ban ioh ia ka hok kumba la bhah ka sorkar kmie? hato ka NOC shna surok ka kynthup ruh kum ka NOC ban tih ia uta u Uranium? Lada ka NOC ban tih Uranium ka dei la ka jong, kaei ka daw kaba don ha lynet ban pynlong ban iakhih pyrshah ban trei ia ka surok kaba ai jingmyntoi ia ki paidbah?
Kumban pynkynmaw ba ha u snem 2006 – 07, ka KHADC ka la pyntrei kam hi ia ka surok Uranium (UCIL) na Wahkaji sha Mawthabah ia kaba ki ong “ym lei lei”. Ha kito ki por ka KHADC ka la dep nguid, mynta ka la prie biang bad sa katno pat kan sa nguid ia la ka jong ka prie? Ha u 2006 – 07 ka KHADC ka la iaid lait ia ka jingpyrshah jong ki babun ki trai jaka kiba pyrshah ban trei ia ka surok UCIL bad wat ha ka Public Hearing lajop ki nongpyrshah hynrei ia ka jigtrei la pyniaid shaphrang. Imat ha kane ka kynti ruh ka rai kut ban sangeh ne ban pyntrei ia katei ka surok la don kam ban rai da ka Public Hearig.
kum ka JAC ngi dawa ba ka sorkar ka dei ban pynbeit da ka Public Hearing lada ka KHADC kam lah ban rai ban ai NOC ban pyntrei ia kane ka surok, bad tang na ka daw ba u sheptieng ia ki katto katne kiba khwan myntoi kiba u ong “kiba bun” ki la ia pyrshah.
Ka JAC ka ieng beit ha ka nongrim ba lada long ha kano kano ne da kano kano ka lynti ngim dei ban duh ia kane ka surok bad ngin iakhun beit ban pynioh ia ka hok kum ki nongshong shnong jong ka Bri U Hynniewtrep U Hynniewskum hapoh ka Ri India wat ban khlong ia u dohnud bad u khyllai jong kito kiba pyrshah kiba la wan tyrwa sngebha da lade kumba la pynpaw ha ki kotkhubor. Ngim salia wat ban khlong ia ki dohnud bad khyllai bad ngin iaid halor ki met iap jongno jongno kiba wan tyrwa sngewbha lada ngi duh ia ka hok jong ngi. Ngi ieng ha ka nongrim ban dawa NOC shna surok ym ka NOC ban tih Uranium.
Ha ka jingiakynduh lang ka ba lalong ha ka 22tarik mynta u bnai ba la khot pynlong da u Chief Minister ka jylla u Dr. Mukul Sangma ia baroh ki seng bhalang kiba pyrshah bad kiba kyshan ia kane ka surok, ha kane ka jingiakynduh la iakren halor ki artylli ki mat; kawei ka dei ka mat tih Uranium ha kaba baroh ki la ieng ban pyshah namar ki paidbah ka jylla ruh ia mynta kim lah ban pdiang ia kane ka jingthmu tih Uranium, ngi ai ka jingiaroh ia ka sorkar jylla kaba la shim rai ha katei ka jingialang ban ym ai lad ban tih Uranium ha ka jylla lymda kim pat ioh ia ka jingmynjur lang da ki paidbah. Ka ba ar ka dei ka halor ka surok Two Lanes, kane ka surok ka sorkar ka la pynshai ba kam don jingiadeibad ka jingthmu tih Uranium.
Ha kaba iadei bad ka jingshah kynthoh ha ki nongialam ka KSU SWKHD, ka JACSO bad LYWA ka JAC ka shim ia ki ym kum ka jingshah kynthoh hynrei ka shim ba ki dang long khynnah palat ban long nongialam, hynrei ki shu kwah ialam da ka bor khlem pat kot ka jingmut jingpyrkhat,ka jingmih kum kine ki nongialam ka pynkulmar jingmut ia ki paidbah bad ka pynkulmar shnong ruh namar tang ialade kim pat biang ki sdang tare sha kiwei. Ki sngew ba ka pyrthei bad ka bneng ka la dei lypa ka jong ki, wat U Blei ruh jong ki baki sa nud ban tyrwa sngewbha wat ban shu phah khlong kai ia u dohnud bad u khyllai jong ki.
Ngim kwah ban ia jngi lang ha ka sain pyrkhat jong ki Dei namar ba kim pat kot ka jingmut jingpyrkhat ki dang shah ialam bakla hano re hano. Ngim don por ban ia kynthoh ia kiwei namar ka Jaidbynriew jong ngi ka don ha ka sohsat, ka jingsahdien ha baroh ki liang. Ka jingsah dien ha baroh ki liang ka dei namar ba ngim don ka lynti syngkien kaba biang kumba long lem kiwei. Ngi kyntu ia kitei ki nongialam ban ia treilang na ka bynta ka jingmyntoi jong ka jaidbynriew ym ban shu lap miet ha kaba wad daw ban woh dong ia kiwei. Da pyrkhat bha shwa ban kren ne kynthoh ia kiwei ioh long kum ka Jakoid kaba ia kynduh jingeh tang namar ka shyntur la jong “A Frog troubles with its mouth”. Ong u Bah Zandy Myrthong Secretary JAC.
