Shillong, Nailur 23: Ki nongialam jong ka party BJP hapoh ka jingialam jong u president u Bah Shibun Lyngdoh, ha ka jingiadon lang u Arvind Yadav secretary ka seng ba dei peit ia ka jylla Meghalaya kila leit ban ia kynduh ia u Dr DD Lapang myntri rangbah ba rim ka jylla ha iing sah jong u ha ka sngi Thohdieng.
Kane ka jingleit ia kynduh ka long ban ia mir jingmut ba lada lah ban ia treilang hapoh ka party BJP na ka bynta ka roi ka par jong ka jylla baroh kawei. Ha kane ka jingiakynduh kila kit bok ruh ba un ioh ia ka met kaba koit kaba khiah.
Na ka liang jong ka party UDP ruh hapoh ka jingialam jong u Bah Bindo M Lanong Working President jong ka UDP, u Dr Jemino Mawthoh bad u bah Donbok Khymdeit kila leit ban ia kynduh ia u Dr DD Lapang ban ia kren ia sngewthuh lada ka long ba kin ia treilang na ka bynta ka bha ka miat jong ka jylla baroh kawei. Ha ka juh ka por ki ai ka jingkit bok ban ioh ia ka met kaba koit ba khiah.
Ha ka juh ka por u Bah Min Sing Makri working president jong ka Ri Bhoi DCC, u ba dei ruh u nongai buid ia ka NBCC, u Bah F Khymdeit nongkit kam ba hakhmat jong ka NBCC, u Bah Donlang Sohkhlet Secretary MPCC kila mih noh na ka seng Congress ban ia don lang bad u Dr Lapang.
