Shillong, Nohprah 12: Ka Khasi Students’ Union (KSU) lyngba kane ka kyrwoh ka maham tyngeh ia ka sorkar Meghalaya halor ka jingleh donbor bad shet shukor ka sorkar da ka kem ia u samla Steven Kharkrang u President KSU Umiam Circle mynta ka sngi ha kaba ia dei bad ka mat jong ka lynti rel.
Kum ban shu pynkynmaw ia ka sorkar ba hadien ka jingiakynduh lang jong ka bad ki nongialam seng bhalang ha ka 19.07.2017 ka rai kaba la mih na kato ka jingialang ka long kum ka jingiaburom bad sngewthuh markylliang ha kaba ka sorkar ka la shim ia ka rai ban phah sangeh noh ia ka jingpyntrei ia ka lynti rel ha byrnihat bad kumjuh ruh ka seng ka la sangeh lut ki jingthmu ban pynlong jingiakhih wat lada haduh 32 ngut ki dkhot ka seng ki la shah kem.
Hynrei kane ka jingkem kynsan biang ia u dkhot jong ka seng na North Khasi Hills ka pynpaw ba ka sorkar ka thmu ban thom beit da ka bor ia ki dkhot ka seng haba ki dawa ia kano kano ka hok jong ka Jaidbynriew Khasi.
Kane ka pyni shai ba ka sorkar kam don jingkitkhlieh na ka bynta ka Jaidbynriew Khasi bad lada ka sorkar kam don kum kata ka jingkitkhlieh ka seng kam banse ban pyni da ki kam kiba har rukom ban iada ia ka hok longtrai u Khasi Khara.
Ka seng kan ym shong kli kti da leilei ruh em halor kane ka jingjia bad lada bthei kano kano ka jingiakynad ha kine ki sngi ki ban wan, ka sorkar ka hap ban shim ia ka jingkitkhlieh.
Kum shi bynta ka seng ka sngew thamula ba balei ka sorkar ka shim khia ban thwet bad thep along beit tang ia ki dkhot ka seng kiba mih ban iada ia ka Jaidbynriew. Balei kam shim khia ban kem ia ki nongkhaii droks kiba ha khleih duh, balei kam lah ban kem ia kito ki kiba tuh na khmat ki banks bad ATMs kylli ka KSU ia ka sorkar.
Ka khubor kaba khatduh jong ka seng sha ka sorkar ka long ba ka dei ban pynlait noh mardor ia une u samla bad ban sangeh noh shi syndon ia ki jingthom bor pyrshah ia ki dkhot jong ka seng lym kumta ka seng kam banse ban pyrkhat da kumwei pat.
