Shillong, Iaiong 05: U Bah John F Kharshiing mynta ka sngi u la phah ia ka shithi resign na ka kam General Secretary bad kum u Vice president na ka party Congress sha u president ka MPCC u Dr Celestine Lyngdoh, kane ka jingmih ka long ka jingduh kaba khraw ia ka seng congress namar kane ka MP ilekshon kala ha khmat.
Kane ka dei ka shithi kaba la thoh da u bah John Kharshiing sha u president ka MPCC ban pyntip ba u la mih na ka party “Ha kaba nyngkong nga sngewdei ban ong ba ka la long ka burom ia nga ban iohlad ban ia treilang ryngkat hapoh ka seng Indian National Congress (INC), kum u dkhot primary member, Vice President, MPCC, bad General Secretary, MPCC, naduh ba nga la rung sha ka seng INC ha u September 2012”.
Ha kane ka shithi u Bah John u la ong ba “Na ka bynta ban buddien ia ki hok kiba kyrpang (core political issues) jong ka jaidbynriew Khasi, Jaintia bad Garo, bad hadien ka jingpyrkhat kaba sanibha halor ka lawei jong ka Ri nga la shim ia ka rai ban weng noh ia lade mardor kum u dkhot ka seng Indian National Congress, naduh mynta ka sngi ka 5tarik April 2019”.
