Mmynta u bnai u Syiem Jirang yn pynphai  ia ka Nongwah Mawtamur sha Hima Sohiong: Pyniaid

Shillong, Naiwieng 14: U Deputy Chief Executive Member jong ka KHADC u bah Pyniaid Syiem haba kren ha ki dkhot jong ka Joint Action Committee jong ka Hima Sohiong kiba la wan ba ker ia ka KHADC mynta ka sngi u la ong ba na ka liang jong ka EC kala ai por ia u Syiem ka Hima Jirang haduh ka 25 tarik mynta u bnai ban pynphai ia ka raid Nongwah Mawtamur sha ka Elaka Sohiong.

Haba kren ha ki dkhot jong ka JAC ha phyllaw jong ka KHADC ha dien ka jingiakynduh ha kamra jong jong u Chief Executive Member u Bah Twienwell Dkhar u Bah pyniaid u la ong ba ka KHADC kam shym la shong kli kti ha kaba ia dei bad ka jingujor ka jong ki pyrshah ia u Lyngdoh ka Hima Sohiong halor ka jingkynnoh ba u la aiti sha ka Hima Jirang ia ka Raid Nongwah Mawtamur.

Na ka liang jong u bah Pyniaid u la ong ba ha ka jingpeit bniah jong ka EC kala shem ba ka jingaiti ia katei ka raid sha ka ka Hima Jirang ka long na ka bynta ka bit ka biang jong ki paidbah kiba shong ha katei ka jaka bad ha ka juh ka por kim shym don ki kot ki sla kiba biang ban pyni ba ka Nongwah Mawtamur ka hap hapoh jong ka Hima Sohiong.

U Bah Pyniaid u la iathuh ha khmat jong ki nongialam ka JAC ba katba ka EC ka dang peit bniah ia ka jingujor ka jong ki, la don kiba wan ai ia ki kot ki sla sha ka EC ban pynshisha ba ka Nongwah Mawtamur ka dei hapoh jong ka Hima Sohiong dei halor kane ba ha ka 25 tarik Risaw ka EC kala thoh sha u Syiem ka Hima Jirang ba kin pynphai noh ia kane ka jaka hapoh ka 25 tarik mynta u bnai.

Na ka liang jong ka u Deputy CEM u la ong ba ka samih kane ka jingiawan tur paidbah mynta ka sngi ka dei tang na ka daw ba ka EC kam shym la phah jingtip ia kaei kaba kala leh ha kaba ia dei bad katei ka kam ai jaka. Mynta ka sngi na ka liang jong ka EC kala ai ia ki kot sha ka JAC.

Ha kane ka jingkren sha ki dkhot jong ka JAC, u la iathuh ruh ba ka KHADC kan nym shah ia ki hima ba kin ia ai jaka na kawei ka hima sha kawei pat ka hima khlem ka jingtip kaba biang namar kane ka wanrah ia ka jingklumar ha u pud u sam jong ki hima bad khamtam eh ha khappud bad ka jylla Assam.

What Next?

Recent Articles

Leave a Reply

Submit Comment

*