Jowai, Jylliew 22: Ka seng Jantia National Council (JNC) – Mid East Unit, ka dap da ka mynsiem ba sngewkhia bym ioh bor ding ki hynniew tylli ki shnong hapoh East Jaintia Hills District. Kiba kynthup naduh ka shnong Malamanoh, Moosniang, Moolang, Rangad bad ter ter. Kum ban shu pynkynmaw ba naduh ba la pluh ka Moowakhu Substation ha ka 31.06.17 kaba don hapoh ka shnong Dkhiah West.
Ha kaba ka ding ka la bam ei haduh lai tylli ki tranformer. Naduh kata ka sngi haduh mynta kine ki hynniew tylli ki shnong kim pat ioh bording. Bad Kane ka buh ia ki nongshong shnong jong kine ki shnong ha ki jingeh bakhraw. Bad khamtam ia ki khynnah skul kiba dang don exam mynta, ka ktah ia ka por pule kot jong ki namar kim lah ban pule kot ha ka por jan miet bad mynstep.
Ka JNC-Mid East Unit ka kyntu ia U Executive Enginner, Khliehriat Division ban phai khmat sha kine ki jingeh jong kine ki shnong bad ban pynioh bording ia ki kine ki hynniew shnong tang kumba ioh kiwei kiwei ki shnong hapoh ka District ym ban shu pynsah ia ki tang ha ka jingdum jong ka miet.
Ka seng ka sngewthuh ba namar ka jingpluh jong ki lai tylli ki transformer ka ktah ia ka District baroh kawei, ka buh jingeh ia ka MeECL ban pynbiang bording hapoh ka District kumba ju long hynrei wat la kata ruh ka seng ka kyntu ban pynioh bording ia kine ki shnong tang katto katne kynta khamtam ha ka por mynmiet khnang ba kan long ka jingmyntoi ia ki khynnah skul ba pynkhreh exam shiteng snem mynta. La ong u Bah Nini W. Sungoh President JNC Mid East Unit.
