Shillong, Iaiong 01: U Shatana Mukherjee Deputy General manager jong ka Bank Baroda ba dei peit ia ki jylla ka dong shatei lamih ngi, mynta ka sngi u la pynbna paidbah ba ki lai tylli ki Bank, ka Baroda, Vijay bad Dena Bank kila long noh kawei naduh mynta ka sngi ha ka kyrteng “Baroda Bank”.
Haba kren ha ki nongthoh khubor mynta ka sngi, u Mukherjee u la ong ba, ia mynta baroh ki Bank Account jong kine ki lai tylli ki Bank kin dang neh kum juh bad ki nongthep pisa ha kine ki lai tylli ki Bank kim dei ban khuslai namar ka jingiadei bad ka jingkynsiew pisa jong kan long kum juh kan nym ktah ei ei.
Da kane ka jingpynlong noh kawei ia kine ki lai tylli ki Nationalist Bank kan wan rah ia ka jingmyntoi sha ki paidbah jong ka Ri India baroh kawei bad kyrpang ia ka dong shatei lam mih ngi jong ka Ri India namar nangne sha khmat kin sa plie shuh ia ki shnat trei kam ha kane ka thain.
Haba jubab ia ki jingkylli, na ka liang jong u Mukherjee u la ong ba la shim ia kane ka kyrteng Baroda namar kane ka Bank ka don ia ki shnat trei kam jong ka sha bar jong ka Ri India, katba ka Dena Bank bad ka Vijay Bank kim don, kumta la shim ia ka kyrteng jong ka Baroda Bank.
Haba phai sha ka jingdon ki shnat jong kine ki lai tylli ki Bank ha kane ka jylla Meghalaya la ong ba ki don tang 10 tylli ha baroh kawei jong ka jylla Meghalaya. Na ka liang jong u Mukherjee u ong ba da kane yn la sah ban kham pynkhlain ia ka jingairam sha ki paidbah.
