Shillong, Nohprah 01: U Jagadish Hiremani u dkhot jong ka National Commission For Safai Karamcharis (NCFSK) ba dei na ka tand jong ka Social Justice bad Empowerment jong ka sorkar pdeng u ba dei peit ia ki ar tylli ki jylla, ka jylla Meghalaya bad Assam u la wan sha Meghalaya ban ia kynduh ia ki nongtrei bylla kiba pynkhuid ia ki surok ha kane ka jylla Meghalaya.
Haba kren ha ki nongthoh khubor mynta ka sngi une u dkhot jong kane ka commission jong ka sorkar pdeng u la ong ba na ka jingiakren bad kine ki ba trei bylla ban pynkhuid ia ki lyngti syngkieng bad ki surok ha kane ka nongbah Shillong u la shem ba ka jingsiew ia ki ka long tang T.3000/- ha ka shibnai bad kata ruh kim juh ioh thikna man u bnai. Haba ia dei bad kane u la ong ba un sa thoh sha u Chief Secretary jong ka jylla ban pynkiew ia ka bai bylla jong ki sha ka T.10000/- shi bnai.
U la ong ba ka long kaei kaei kaba sngewsih ban tip ba wat la ka jingsiew kaba rit, hynrei kim ioh pat man u bnai, u long ba dei ban pynslem ia ka tulop jong ki ophisar dei ban siew ia ki man u bnai namar kine ki briew ki long kiba duk na kiba duk tam kim dei ban pynslem ia ka tulop ka jong ki.
Na ka liang jong ka sorkar pdeng kala buh bun ki skhim ban ia rap ia kine ki briew ba kin lait na kane ka kam kaba kitrei, lada ki don ki khun ki kti jong ki kiba la heh la san ka sorkar ka dei ban ia rap ia ki ba kin lah ban ieng ha la ki jong ki kjat. Bad kine ki briew ki dei ban ioh ia la ka jong ka iing ka sem ka jong ki bad kano kano ka skhim shna iing kaba ka sorkar ka don kadei ban ai nyngkong ki.
Haba ia dei bad ka jingpule ki khun ki kti jong ki ka sorkar ka dei ban mang kyrpang 5% na ka bynta ki khun ki kti jong kine ki briew ha man ki jaka pule la ki dei ki jong ka sorkar lane jong ki riew shimet. Ka bhah ba kyrpang ka dei ban don. Ha ka juh ka por ha kaba ia dei bad ka koit ka khiah ka jong ki ki dei ban ioh ban shim dawai la kumno kumno shisien ha ka lai bnai.
