Shillong, Naitung 20: ka seng Federation All Meghalaya Adhock School Teacher Association (FAMASTA) mynta ka sngi kala pynkup burom ia ki saw ngut ki khynnah skul kiba la wan ba saw na pdeng ki 20 ngut ha ka eksamin Secondary School Leaving Certificate (SSLC) jong u snem 2017 ia kaba la pynlong ha Khasi National Dorbar Hall ha Mawkhar.
Ia ki khusnam la sam da ka myntri ba deipeit ia ka tnad pule puthi jong ka jylla ka Debora Marak, ha ka jingkren ka jong ka kum ka kongsan kala ong ba ki samla pule ha kane ka por ba mynta kim dei shuh ban shaniah ha ka “Reservation Policy” namar kane ka lah ban duh noh ha kano kano ka por, hynrei ki dei ban pynrung ha ki ia ka mynseim ia kop.
Kala ong ba kyntiew ia ki khynnah ka pule puthi don kam ia ka jingiatreilang jong ki kmie ki kpa, ki nonghikai bad ki khynnah skul, kine lai ki long ki mawbyrsiew ban rah ia ki khynnah sha jrong ha ka jingpule jong ki bad ha ki liang baroh. Ha kane ka sngi la don lang ruh u Bah P Ryngksai Joint Director ka tnad pule puthi.
Ki samla pule kiba la shah pynkup burom ia kiba la pass na ki skul Adhock , ki long ka samla Idarikor Wanshong na Eriben Presbyterian Secondary school Shillong kala wan ba ar, u samla Sakaniroi Tariang u la wan ba hynriew na KJP Synnod Mihngi Secondary School Jowai, u samla Eveningstar Ryntathiang na Mawkynsah Secondary School Mawkohmit u ba la wan ba khatar bad u Erickson Lyngdoh na Eriben Presbyterian Secondary School Shillong u la wan ba khatkhyndai.
Ia kane ka jingai khusnam ka dei ka jingsdang na ka liang jong ki dkhot jong ka FAMASTA, ha kaba ki la shim ia ka rai ha ka jingialang jong u bnai Jymmang mynta u snem bad kane ka long ban pynshlur ia ki samla pule ba kin leh bha ha kip or ki ban dang wan.
