Shillong, Naitung 04: Ka jingiakhih ba khlem buh por da ki nongtrei jong ka Meghalaya Transport Corporation (MTC) kala kot sha ka phra sngi mynta ka sngi ban pyrshah ia ka jingwengnoh jong ka sorkar ia ka kong A. Nikhla kum ka Managing Director jong ka Coorporation.Halor kane ka jingiakhih jong ki wat la kala iaid mynta la phra sngi na ka liang jong ka sorkar ka dang sngap man man ha kaba ia dei bad ka jingdawa jong ki nongtrei.
Katkum ka jingpybna sorkar kaba la pynmih da ka personal department, ka long ba la pynlynriah noh ia ka kong A Nikhla kum ka MD jong ka MTC bad ha ka jaka jong ka ka sorkar ka kwah ban wanrah noh ia u PM Sangma Commissioner Transport kum u MD ba thymmai ia kaba ki nongtrei ki pyrshah. Ka kong Nikhla ka dang bat ia kane ka kam tang kumba khyndait bnai mynta.
U Bah K Rumnong General Secretary na ka liang jong ka Union haba kren ha u SP News Agency mynta ka sngi u la iathuh ba kila ia kynduh ia u myntri ba dei peit ia ka tnad Transport Department u Bah HDR Lyngdoh, ha ka jingiakynduh u la ong ia ki nongialam jong ka Union ba na ka liang jong um don jingtip ei ei namar ia kane kakam la leh na ka ophis jong u Myntri Rangbah ka jylla namar ia ka kam jong ka personal department la bat hi da u Myntri rangbah ka jylla.
Na ka liang jong ka Union kin dang iai beteng ia kane ka jingiakhih ka jong ki haduh ba ka sorkar kan ai da ka jubab kaba shai kdar la kan pynneh ne em kumba la dawa da ki nongtrei jong ka MTC ban pynneh biang ia ka MD kaba mynta, lane ka sorkar ka dei ban jubab lada kan wanrah noh da u MD ba thymmai hynrei kumba ka long mynta ka sorkar ka sngap jar jar khlem da ai kano kano ka jubab.
Kane ka jingiakhih ka jong ki nongtrei ka MTC ka long da kaba khanglut ia baroh ki aka die tiket Bus, Tiket Rail bad ka Tiket Helicopter. Ki nongtrei jong ka MTC kila sdang ia kane ka jingiakhih ka jong ki ha ka 27 tarik jong u bnai Jylliew bad mynta kala iaid phra sngi lynter.
