Shillong, Jylliew 26: Ka iing dorbar jong ka KHADC mynta ka sngi kala pdiang ia ka mang tyngka jong u snem 2020-2021 kaba la kot sha ka T.243.72 klur khlem da don kano kano ka jingiakren ha baroh khatwei tylli ki tnad kiba don hapoh jong ka District Council.
Ha kane ka sngi ka iing dorbar kala pdiang ruh ia ki lai tylli ki bill kiba la wanrah da ka Executive Committee khlem da don kano kano ka jingpynkylla. Ki lai tylli ki bills ki long ka Khasi Hills Autonomous Distrcit (Allotment, Ocupation, or Use or Setting apart of Land) Regulation Bill, 2020,
Ka Khasi Hills Autonomous Distrcit (Regulation and Adminstration of Land) Bill, 2020 bad ka Khasi Hills Autonomous Distrcit (Solid Waste Management ) Bill, 2020.Ha kane ka sngi ka iing dorbar kala pdiang ruh ia ka United Khasi-Jaintia Hills Autonomous Distrcit (Trading By Non Tribal’s) (Tenth Amendment Regulation Bill, 2020.
Ka iing dorbar kala pdiang ia kitei ki bill baroh khlem da don kano kano ka jingiatai hapoh ka iing dorbar, u Bah Gabriel Wahlang MDC jong ka Nongstoin na ka seng Congress u la wanrah ia ka jingpynkylla ha kab ia dei bad ka Khasi Hills Autonomous Distrcit (Allotment, Ocupation, or Use or Setting apart of Land) Regulation Bill, 2020, hynrei u la weng noh ia ka jingwanrah ia ka jingpynkylla.
U Lamphang ka iing dorbar u bah Pyniaid Sing Syiem ha dien ka por jingkylli u la pynbna ba ha kane ka dorbar mang tyngka baroh ki jingkylli kiba la ioh pdiang ki long 21 tylli bad kiba ka EC kala jubab ki long 15 tylli bad haba shim ha ka jingkhein ka long 71.42%. Ha kane ka dorbar mang tyngka ka jingpoi jong ki dkhot ka iing dorbar ka long 100%.
