Shillong, Jylliew 04: U bah Sanbor Shullai myntri ka sorkar jylla ba dei ruh u MLA jong ka 19-Shillong South mynta ka sngi u la plie ia ka “Greenery Children’s Park” ha Lumparing ia kaba la bei pisa na ka sorkar pdeng lyngba ka skhim AMRUT.
Haba kren ha ka jingplie ia kane ka jaka ialehkai ki khynnah u bah Sanbor u la iathuh ba ia kane ka jaka la ai ai da ka tnad khlaw jong ka sorkar pdeng ha kaba u la leit hi sha Delhi ban ban ia kynduh ia u Secretary ka sorkar pdeng, ha dien katta ia ki kot ki sala la ai da ka tnad khlaw na ka sorkar jylla.
Kumba a long mynta ha ki jaka sor ym don jaka ia ki khynnah ba kin ia lehkai, da ka jingioh ia kane ka jaka na ka sorkar pdeng kala pynlong ia ka Upper Lumparing ba kin ioh ia ka jaka ban ia lehkai ki khynnah kiba hapoh ka 12 snem ka rta. La shna ia kane ka park ha ka jinglut kaba T.26.44 lak tyngka.
U Bah HB Wahlang rangbah shnong ka Upper Lumparing la pynpaw ia ka jingsngewnguh ia u bah Sanbor u ba la trei borbah shisha pynioh ia ki skhim kiba bun jait, naduh ki surok, ki lynti iaid kjat, kiwei kiwei ki shim bad kane ka jaka ialehkai ia ki khynnah. Ha kane ka sngi la don lang kiwei ruh ki rangbah shnong bad ki nongialam seng bhalang bapher bapher na Lumparing.
Ha kane ka sngi la sam ruh ia ki khunsam sha ki nongjop kiba la ia shim bynta ha ki jingialehkai kiba bun jaid bad ia ki khusnam la sam ruh sha ki shnong bad ki kynhun ruh kiba la jop ha ki jingiakop bala pynlong ha kine ki khyndait sngi kiba la dep.
