Shillong, Nailar 9: U myntri rangbah ka jylla u Conrad K Sangma u la plie ia ka jingpule Science Stram bad ia ka laboratory ha poh jong ka St Gabriel’s Higher Secondary School Upper Shillong, ha ka jingiadon lang u myntri kam pynroi sor u Bah Hamletson Dohling u ba dei ruh u MLA jong katei ka jaka.
Ha ka jingkren jong u myntri rangbah u la ong ba ka jingplie ia kane ka shnat pule ka long sa u wei pat u mawjam ban iarap na ka bynta ki samla pule katei ka thain baroh kawei. U la ong ba na ka liang jong ka sorkar kan ialeh katba lah ban iarap ia ki skul ha baroh akwei ak jylla.
U la ong ba ka jingthmu ban wanrah ia ka jingpynkylla ha ka National Education Policy ka long kaei kaei kaba bha, hynrei ki don ki katto katne ki bynta kiba hap ban dang ia mir jingmut bad baroh kito kiba don bynta ha ki kam pyniaid skul. U la kyntu ia ki samla pule ba kin long kiba trei shitom bad ba kin pynrung ha lade ia ka jingsngewrit.
Kiwei kiba la kren ha kane ka jingialang plie ia kane ka stnat pule ki long u Bah Hamletson Dohling, U Arch Bishop Dominic Jala, Bah Endra Kharkongor, President, School Managing Committee bad u Fr Paulose Palamattam, Secretary jong ka School. Ha kane ka sngi la pynlait paidbah ruh ia ka skul bus ba la beit na ka Chief Minister’s Special Rural Development Fund (2018-2019).
