S
hillong, Naitung 28: U myntri ka sorkar pdeng ba dei peit ia ki kam rep u Radha Mohan Singh mynta ka sngi u la pynbna paidbah ha madan Polo ba ka sorkar pdeng kan bei pisa haduh T.215 klur na ka bynta ka “ Meghalaya Milk Mission” lyngba ka National Cooperative Development Corporation (NCDC) ban pynrulong ia ka jingthmu jong ka sorkar pdeng ban pynkiew ar shah ia ka jingioh jong ki nongrep ha u snem 2022.
Ia kane ka pisa yn pyndon kam ha kaba ai bun ki jinghikai ha kaba ia dei bad ka kam ri jingri ban pynmih Dud. La ong ba ia kane ka Meghalaya Milk Mission la sain dur ha kata ka nongrim ba ka don ka jingduna ha ka jingdon kam bad ka jingpynmih ia ka Dud, ka jinglap jong ka ICAR ka long ba ka jingpynmih Dud ha kane ka jylla ka long kaba duna bad da kane kan iarap ia ka jylla ban thied Dud na sha bar ka jylla.
U myntri ka sorkar pdeng u la ong ba ha kane ka jylla Meghalaya na ki 6449 tylli ki shnong, ki shnong kiba don ia ki kynhun ia treilang ki long 97 tylli. U la ong ba 60 % na ki shnong ha kane ka jylla ki tip ba ka kam rep ka dei kaba don kam, kumta ki kynhun treilang kin long kiba biang eh ban shimti ia kane ka kam pynmih Dud. U la ong ba ka sorkar pdeng ka ai ka jingkyrshan ban pynshlur ban seng ia ki kynhun ia treilang.
La ong ba kane ka Milk Mission kan pynmyntoi haduh 2000 ngut ki nongrep ha kane ka jylla ha kine ki saw snem ki ban dang wan. Kane ka Milk Mission kan iarap shibun namar ha kane ka jylla Meghalaya ka rukom pyniaid iew ia ka Dude kam don.
Kane ka Milk Mission kan iarap ia ki 2000 tylli ki jaka ri masi ban pynmih Dud, ka wei ka jaka ri masi ka dei ban don 5 tylli ki masi, kan don ka sem, kan don ka jaka buh jingbam, ka jingbuh insurance iaki masi, kin ioh 79 tylli ki kor khem Dud kiban ngiam 500 litter, 13 tylli ki kali kit Dud kiban ngiam 3000 litter bad kan don ruh ka jingmang pisa kaba shiklur ia ki nongrep kiba la wan shah hikai.
Kiwei kiba la kren ha kane ka jingplie ia ka Meghalaya Milk Mission ki long u Lat ka jylla u Ganga Prasad, U Deputy Chief Minister u Bah Prestone Tynsong, u ba dei peit ia ka kam ri jingri ha ka jylla. Kiwei kiba la ia don lang ki long u Managing Director NCDC, u Sundeep Kumar, u Chief Secretary jong ka jylla Meghalaya u Y Tsering,Commissioner bad Secretray ka tnad ri jingri jong ka jylla u Sampath Kumar bad kiwei kiwei ki heh sorkar.
