Pyndon kam ia ka jingstad jong phi ban myntoi u paidbah ong u Conrad ia ki ophisar sorkar

Shillong, Iaiong 20: U myntri rangbah jong ka jylla Meghalaya u Conrad K Sangma bap lie ia ka jingrakhe ia ka “Civil Services Day 2018” ha ka jingialang kaba la long ha  State Convention Centre, Shillong. Ha ka jingkren ka jong u u la ai ka jingiaroh ia ki ophisar kiba la lah ban trei bun ki kam na ka bynta ka jylla ha kine ki snem baroh.

Ha ka juh ka por na ka liang jong u myntri rangbah u la kyntu ia ki ophisar ba kin pyndon kam ia ka jingstad jong ki bad ka jingnang jingtip kaba ki don na ka bynta ka jingmyntoi jong u paidbah bad ban wanrah ia ka jingkylla ha ka jingim jong ki paidbah.

U la pynkynmaw ruh ia ki ophisar baroh ba, haba ki shim ia kano kano ka rai ha kano kano ka por ba ki dei ban shim ia ka rai kaba dei namar ka thong jong ka sorkar hi ka long ban wanrah ia ka jingkylla ha ka jingim kaba man ka sngi na ka bynta ki paidbah.

Haba phai sha ka phang pdeng jong ka jingrakhe ia ka sngi ba kyrpang jong ki ophisar ha ka Ri kaba kyntup ia ki IAS, IPS, IFS MCS, MPC AND SFS, ka phang pdeng ka kren “ Ban pynbha ia ka jingtrei kam katkum ki juk thymmai”.

U myntri Rangbah u la ong ba kane ka juk thymmai kam da dei eh tang na ki kot ki bor hynrei kumno ban pyntrei kam ia ki skhim sorkar ban wanrah ia ka jingkylla ha ka jylla. Ia kane sngi burom na ka liang jong ki ophisar la lam khmat da u Chief Secretary ka jylla u Yeshi Tsering.