Shillong, Lber 09: Ka KHNAM ka pynpaw ka jingbynniaw halor ka jingkren jingartatien jong u MR ba thymmai ka jylla u Conrad Sangma u ba la ong ba “ka ILP kam lah ban weng ia jingeh ki kam mynder”.
Ka jingong jong u MR ba ka ILP ka iatyngkhuh bad ki kam ki ba iadei bad ka ioh ka kot, ka jingkylla ka mariang, ha kaba ka jingkiew ka um ka lah ban pynlong ia ki briew ban phet sha kane ka jylla ki long ki jingkren ki ba ngim lah ban pdiang, tang namar ka jingkiew jong jong ka um bad ka jingphet jong ki jaitbynriew na kiwei ki jaka kin shu pynlong ia ka jylla ka jong kaba pynlaitlan kam long kaba iahap.
Ka KHNAM ka kwah ban pynkynmaw ia ka UDP, HSPDP bad kongsan eh ia ka NPP ki ba don ha ka bor synshar ba haka 23 sept 2013 ka la don ka jing ia kynduh jong ka NPP, UDP, HSPDP ba la lum da ka KHNAM ha Shillong Club ban ia tai bad ia thir halor ka ILP bad baroh ki party ki la mynjur ban pynbor ia ka sorkar jylla ban pyntrei kam ia ILP ban teh lakam ia ka jingrung kyrthep ki mynder, hynrei mynta ynda la ioh bat hi ia ka bor synshar kine ki juh ki seng ki ong ba ym lah ban leh ia kane kaba pynpaw ia ka jinglong arsap jong ki.
Ka KHNAM ka dawa jur ban pyntrei kam beit pura ia ka ILP kongsan eh ha rilum khasi bad Jaintia katkum ka Bengal Eastern Frontier Regulation 1873. U myntrei rangbah ba thymmai ka jylla u dei ban khot ia ka jingia kynduh lang jong baroh ki political party halor kane ka bynta ban pynbeit bad ban pyntrei kam noh ia ka ain ILP naka bynta ban iada ia ki trai ri trai muluk. Ong u bah Thomas Passah president Youth Wing.
