Pynsangeh u DC ka EJH District ia ka jingsngap paidbah ia ka jingkwah shim jaka ka Star Cement

Shillong, Naiwieng 21: U Deputy Commissioner jong ka East Jaintia Hills District u bah Ethelbert  Kharmalki mynta ka sngi u la pynsangeh noh ia ka jingsngap paidbah halor ka jingkwah shim par mawshun  shuh ka kompeni Star Cement ha Brichyrnot ha dien ka jingpyrshah jur jong ki paidbah ia kane ka jingkwah shim jaka.

Haba kren sha ki paidbah na ka liang jong u DC, u la ong ba u DC u dei u shongknor ban pyniaid ia kane ka jingsngap paidbah katkum ka Environmental Protection Act bad ka jingdon jong u ha katei ka jaka kam dei ban u ia shah iano iano ruh.

Na ka liang jong u DC u la ong ba ka jingmut jong ka jingsngap paidbah kan long na ka bynta kito kiba shah ktah bad ka hukum jong ka iing bishar jong ka High Court jong ka jylla Meghalaya ruh ka kren kumta hynrei ki don ruh ki bym shah ktah hynrei kampher ia kata.

Na ka daw ba ki paidbah kiba don ha kane ka jingsngap paidbah kila pynthut ia kane ka jingsngap paidbah na ka liang jong u DC u la pynbna ba na ka daw jong kane ka jingpyrshah ki paidbah u la ong ba u sngew bay m lah shuh ban bteng.

Ha kane ka sngi na ka liang jong ki seng bhalang bapher bapher na Jaintia Hills kila ia leit sha katei ka jaka ha jan DC ophis ha Khliehriat ban pyrshah ia kane ka jingpynlong ia ka jingsngap paidbah bad ban pyrta ba ki pyrshah ia ka Star Cement ban shim jaka shuh.

Na ka liang jong ki bor dei peit ia ka District Administration ruh kila pynkhlain ia ki bor pahara ban peit ba kan nym don kano kano ka jingjia kaba sngewsih ha kaba pynlong ia kane ka jingsngap paidbah.

What Next?

Recent Articles

Leave a Reply

Submit Comment

*