Shillong, Rymphang 07: ka kynhun ki seng bhalang hapoh jong ka “Coordination of Hynniewtrep Social Organisation” (CoHSO) kaba la ialam da u Bah Robertjune Kharjahrin mynta ka sngi kala ia kynduh bad u symbut myntrai rangbah ka jylla u bah Prestone Tynsong ban ia kren halor ka jingdawa ban pyntrei kam ia ka Inner Line Permit ha kane ka jylla.
Ha kane ka jingiakren kaba la neh palat kynta na ka liang jong u bah Prestone Tynsong u la pynsngew sha ki dkhot jong ka CoHSO ba kin sa bishar bniah ia kane ka kam hapoh jong ka tnad ain jong ka sorkar jylla bad kum juh hapoh jong ka tnad political jong ka sorkar jylla ha dien kata yn sa rah hapoh ka kabinet ban ia kren.
Ha kane ka jingiakren la pynsngew ruh ba ha dien ba ka kabinet kala pdiang ia kane ka kam yn sa rah hapoh ka iing dorbar thawain ka jylla ban pdiang da ka iing dorbar. Na ka liang jong ka sorkar mynta kala dang iaid sha khmat ban peit bniah ha kaba ia dei bad kane ka bynta ban iada na ka jingwan rung ki briew kiba na bar.
