Shillong, Naitung 07: U myntri rangbah ka jylla u Conrad K Sangma, haba plie ia ka jingiamir jingmut ia kaba la tip kum ka “1st National Conference” kaba la pynlong da ka “Institute of Nursing Cell, Woodland Institute of Nursing, Shillong” da ka jingiatreilang bad ka St. Anthony’s College, Shillong ia kaba la kyrshan na ka skhim “Chief Minister Youth Development Scheme” ia kaba la pynlong ha Shillong.
Ka phang jong kane ka jingiamir jingmut ka long halor “ Ki jingdih buiad, ka jingpyniap ia lade ha kiba la heh la san”. Ha ka jingkren jong u myntri rangbah u la ong ba dei ban pynsngewthuh ia ki samla ba ka kyiad, u Drugs kim lah ban weng ia ki jingpisa dukha”.
Ia kane ka jingiamir jingmut la pynlong namar kala jur palat mynta ka jingdih buaid, ka jingshim noh iala ka jingim lane kaba pyniap ia lade hapdeng kiba la heh la san. Ka jingthmu jong kane ka long ban tip kiei ki jingdih kiba sniew, ban wad bnaih kaei kaba la pynlong ia ki samla ban poi sha kane ka jingjot haduh ban shim noh ia la ka jong ka jingim.
U myntri rangbah u la ong tang ban buh ia ki lad jingiada kan nym lah ban trei kam, hynrei kaba don kam ka long ban ia treilang ha pdeng ki riew sian pyrthei, ki nonghikai, ki khraw pyrhat kum juh ki doktor, ki riew paidbah ban ia leh ia kane ka jingeh.
U la pynkynaw ba ka lawei jong ka jylla, ka ri ka shong ha ki samla, ban pyndon kam ia ka bor jong ki samla don kam ia ki mat trei kam kiba biang khnang ba ki khun samla kin ioh ban sei ia ki sap ki phong kaba ki don na ka bynta ban kyntiew ia ki sha jrong namar ki samla ki long ka lawei jong ka Ri.
U myntri rangbah u la ong ba ki jingdih pynbuaid ki ialam sha ka lynti kaba bakla ia ki samla bad kane ka wanrah ia ka jingktah kaba bun jaid ha imlang sah lang, u myntri rangbah u la ban jur ba dei ban don kilad ki lynti kumno ban hikai ia ki samla ba ki lah ban ia kynduh ia ki jingeh kiba wan ha ka jingim ka jong ki.
Ki nongkren kiba kongsan ha kane ka sngi ki long u Dr. D. Gogoi, Consultant Psychiatrist, Woodland Hospital, Dr. B. Barman, Associate Professor, Department of Medicine, NEIGRIHMS, kong I. Shadap, Clinical Psychologist, Civil Hospital, Nongstoin, kong . M. Anthony, Nursing Superintendent Downtown Hospital, Assam, Dr. B. Bhagabati, nonghikai ba rim ka GMCH, Assam bad u Dr. A. Nongpiur, Asstt. Professor Department of Psychiatry NEIGRIHMS.
Kiba la ia shim bynta ha kane ka jingiakren ki long ka kong J. G. Syiem, Programme Co-Ordinator, NEN, Shillong, u Bah V. Syiem, SP, West Jaintia Hills, Jowai, Bah H. Mohrmen, Bah A. K. Roy, Psychiatric Social Worker, Nazareth Hospital, Shillong bad ka P. Chakravorty, Professor cum Principal, International College of Nursing, Assam.
