Shillong, Jymmang 22: U myntri ba dei peit ia ki kam khyndew ha ka jylla u ba dei na ka seng UDP u Bah Kyrmen Shylla ha ka jingleit ialap elekshon ka jong u na ka bynta u kyrtong ka NPP u Clement G Momih ha Ampati u la kren shai ba kane ka sorkar MDA kaba la ia treilang ka NPP ka UDP bad kiwei ki seng sain pyrthei kan neh baroh san snem.
U la ong wat juh pyrkhat bakla ba ka jingiadei ha pdeng ka NPP bad ka UDP kan kut noh, kim teing ia ka seng Congress, kin ieng lang kawei na ka bynta ban kyntiew ia ka jylla ha baroh ki liang ha ka roi ka par ia kane la kren ha ka jingialap elekshon mynta ka sngi kaba la long ha Murchapani bad Garabokmangre hapoh jong ka Ampati Konstitwensi.
Ha kane ka sngi ki ningialam jong ka NPP, naduh u president, u Conrad K Sangma, U Bah Sniawbhalang Dhar, ka Agatha K Sangma bad ki nongialam ka seng kila ia don sha Ampati ban ialap elekshon na ka bynta u kyrtong ka seng na ka bynta ban pynshai ia ki paidbah ban ai ka jingkyrshan ia ka NPP ha kane ka jaka jong u Dr Mukul.
U Nongialam jong ka NPP u Conrad u la ong ba kane ka Election ka long kaba kongsan haduh katta katta namar ki paidbah jong ka Ampati Konstitwensi ki long kiba la kloi ban pdiang ia ki jingkylla bad kin long kiba la kloi ban don ha ka liang synshar. La ong u Conrad.
