Rakhe ka Riti Academy ia ka lyngkhuh snem ba 151 u mahatma gandhi lyngba ka thohdur

Shillong, Risaw 3: Ka jingrakhe baphuh baphieng ïa ka Lyngkhuh snem Sngikha ba 151 jong u Mahatma Gandhi ka la long ha Riti Academy, Shillong ha ka 2tarik Risaw, 2020 da ka pyninam bad mirnia hapdeng ki barikor jong ka jylla ki ba na nongbah Shillong, na nongkyndong bad katto katne ki ba don shabar na la jylla.

La kren maitphang da u Bah Mr F R Kharkongor, Commissioner jong ka tnatsorkar Teiriti ha ka ba la pynshngaiñ ruh da u Bah K L Nongbri, Joint Secretary and Bah W Nongsiej, Director.

U Kongsan  u la pashat jingmut ïaka saiñ pyrkhat jong u Mahatma Gandhi bad kyntu ïa ki barikor ba kin pynphalang lyngba ka thohdur na ka bynta ban myntoi ka longbriew manbriew.

Ka tnatsorkar Teiriti ka la kyrshan ïa kane ka Rong Pyninam bad kumba khatsan ngut ki barikor ki la shim bynta ha ka ne ka  jingrakhe ryngkat bad u Bah Frederick D Hynñiewta bad Bah Raphael Warjri kum ki barikor rangbah. Kyllum lang la don 52 tylliki dur thoh, ka wei ka kotdur bad saw tylli ki durim.

Ha ka jingïasyllok mirnia baroh ki ba la shimbynta ki la tai halor ka saiñ pyrkhat jong u Mahatma Gandhi katkum ba la phalang lyngba ki dur thoh bad durim jong ki barikor. Kawei na ki dur jong ka Dr Priti C Nartiang ka dei kata ka Sai Mandala ka ba long kumka atiar ba kyntang ban puson.

Katba ka thohdur teirasong jong u Shovin Bhattacharjee ba la jer Mahatma Gandhi in 21st Century ka batai shaphang ki saiñ pyrkhat jong u Gandhi ka ban ïahap tar bad ka juk mynta la ha ka imlang sahlang ne ha ka saiñpyrthei.

Ki dur jong ki rangïaleh laitluid na ka thaiñ kum u Syiem Tirot Sing, u Kiang Nangbah bad u Togan N Sangma kilong ki dur thoh jong u Denis Marbañiang ki ba shon shab ïa ka jingthmu ba kongsan jong u Gandhi na ka bynta ban wan lam ka jinglaitluid na ka ba shah tehmraw ha ki mynder.

Ki kyntien shongsbaijong u Mahatma Gandhi ki la phalang lyngba ki dur thoh jong ka Naisha Richmond Tariang, katba ka snap tynrai jong ka riti Khasi ka shynna ha kidur thoh jong ka Samanda  Nora Pyngrope. Ki dur thoh ba kham kyllum dei ki pyrnonthiedjri ba la thohdur da u Skhemlang Hynñiewta, Revaldo Mawlong bad Mewan Tham.

Kine kila pynksan ba u Gandhi u dei u ba la kyntiew ïa ki sap tynrai na ki thaiñ bad ka jingstad jong ki longshwa manshwa ban shna ki pyrnonthiedjri ka dei kawei na ki bor shemphang jong ka mynnor. Jar la katta ki don ruh ki dur jong u Mahatma Gandhi ba la thohdur ha ka rukom ban ktik ïa ka pyrkhat briew ba la thohdur da u D Henpilen, Aripagos Manner bad Venus Batyngkan Hynñiewta.

Ka kotdur parom (graphic novel) ‘Tynnrai Shwa Ki Tnat’ bad ka durim dulir ‘Behind the Fabric’ da u samla Mario Pathaw ki long ki ba shynna, ki ba ïahap katkum ka juk bad ki ba ïeng rasong ban pynpaw ïa ka snap tyngkai mariang bad ki sap tynrai jong ki bynriew kumba ïalapu Mahatma Gandhi.

Ki durim thawhi jong u Rangskhembor Mawblei ba la jer ‘Line’, ‘Symboh’ bad ‘Syrngiew’ ki tih jyliew ïa ka pyrkhat briew ba kiei kiei ki ba rit ba ria ki don la ka bor ban pyntngen bad pynshngaiñ ïa ka imlang sahlang ne wat ïa ki briew shimet.

Ka mirnia lyngba ki korsyrwet (virtual) ka la wan lam ruh ïa ka dawbah halor ka miatdur, ka lad treikam bad ka la kynshoit ïa ka jinglong jingman jong ka kam teiriti ha jylla Meghalaya.

Ha ka syllok bad tyrko hapdeng ki ba lashim bynta ki la kyrsoi ïa ki mat kongsan halor ka pule danglekatkum ka National Education Policy, kumjuh ruh halor ka Barik Heritage Park ka ba la thmu ban kylla sha ka shlem khaïi pateng bad ka shlem teiriti ba la tip kum ka SICPAC ne Shillong International Centre of Performing Arts and Culture ka ba shongdor haduh kumba 151.32 klur tyngka.

Halor kine kiei kiei la pynsngew ba ki iktiar sorkar ba korbar kam ki dei ban jurip bniah, puson janai bad pynpaw ïa ka phangma (vision) ka ba shynna halor ki kam teiriti ha jylla Meghalaya ki ban ïadei dur bad ka jingangnud jong ki paidbah.

 

 

 

What Next?

Recent Articles

Leave a Reply

Submit Comment

*