Shillong, Iaiong 22: Ka kynhun shipai jongka 101 Area kala rakhe mynta ka sngi ia ka jingdap 55 snem naduh ba la seng ia ka ha kane ka nongbah Shillong. Ia kane ka Len shipai seng ha u snem 1963.
Ia kane ka len shipai la seng ia ka da ka jingthmu ba kan long tang ka jaka phah khubor ha kito ki snem. Hynrei ha ki snem 1966 ha ka por ba ki kam lehnoh hapoh jong ka jylla Mizoram kila jur bha kane ka len shipai kala kylla long kum ka pdeng ban leit ia khun ia ki kam lehnoh ha ka jylla Mizoram.
Ha kitei ki snem kane ka len shipai kala leh bun ki kam bah ha kaba kala ioh ia ka jingshs niah jong ki paidbah nongshong shnong jong ka jylla Mizoram hapdeng ka jingiakhun pyrshah ia ki lehnoh haduh u snem 1969.
Ha ka thma jong u snem 1971, kane ka kynhun shipai kala ia shim bynta bha ha ka jingiakhun ha ki bynta jong ka Sylhet bad Mymensingh ha kato ka por ka dang dei ka East Pakistan bad mynta kala dei ka Bangladesh. Ha kane ka jingiakhun ia kane ka thma dei kane ka kynhun kaba la poi nyngkong hapoh Dacca dei na kane sa ba ioh ia ka nam “Kiba nyngkong ha Dacca”.
Ban kynmaw burom ia ki shipai baroh kiba la aiti iala ka jong ka jingim na ka bynta ban iada ia la ka jong ka Ri, U Lieutenant General u Depinder Singh Ahuja, AVSM, General Officer Commanding, 101 area, u la buh ia u syntiew ha u dur mot ba la shna kyrpang na ka bynta jong ki shipai kiba la phah ia la ka jingim namar ka Ri ha kane ka sngi ba kyrpang.
