Shillong, Nailur 05: Ryngkat bad ka Ri baroh kawei mynta ka sngi ka jylla Meghalaya kala rakhe ia ka sngi burom ba 56th jong ki nonghikai ha ka rukom kaba kyrpang ia kaba la pynlong ha U Soso Tham Auditorium, Shillong ia kaba la pynbeit da ka tnad pule puthi jong ka sorkar jylla ha ka jingiadon lang ki khynnah skul.
Ka myntri ba dei peit ia ka School Education bad Literacy, ka Deborah C. Marak, ha ka jingkren ka jong ka kala ong ba kane ka sngi ka pynkynmaw ia baroh ba kumno ki nonghikai kila betin lynti, ki ai ka jingkyrshan bad kin poi sha ka thong jong ka jingjop bad ban pynthikna ba ki khynnah kin poi sha ka thong.
Ha kane ka sngi na ka liang jong ka myntri kala kyntu ia ki nonghikai ba kin shim khia ia ka kam bad ba kin trei shitom ban kyntiew ia ka jylla ha ka liang jong ka pule puthi. Ka myntri kala kyntu ia baroh ki nonghikai kiba khlem pat lah ban pyndep ia ki training jong ki ba kin leh ia kane ka kaba don lyngba ki lad ai jinghikai kiba don.
Ha kane ka sngi la don lang u secretary ba dei peit ia ka pule puthi u Bah W R Lyngdoh, Director u A. Ch Marak, u T G Momin, Joint Director jong ka MBOSE u Bah M Marbaniang, ki principal na ki skul. Ha kane ka sngi ka myntri kala pynkup burom ruh ia ki 13 ngut ki nonghikai haka kyrdan State Award, lai ngut ki nonghikai ha ka kyrdan District Award bad lai ngut kiwei pat kum ka jingkhusnam kaba kyrpang.
