Sngewkyndit ban iohi ia ka jingpyrshah ia ki kam pynroi ba la wanrah da u MP: Kanol

Shillong, ïaïong, 02: U Sordar Raid Kongthong, Hima Sohra, u Bah Kanol Majaw u la pynrem ia ka jingpyrshah jong u Bah Sylloklang Majaw katkum ba la pynmih ha ki lad pathai khubor ha u bnai baladep ban pyntrei ia ki song pynroi ba la ai sngewbha da u MP ka Rajya Sabha u Prof. Rakesh Sinha sha ka shnong Kongthong.

U Bah Kanol Majaw ha u kyrwoh jingpynshai ba la phah mynta ka sngi u Blei ula ong, “ka Dorbar jong nga u Sordar jong ka Raid Kongthong hadien ba la iohi ia ka jingpynmih khubor da u Sylloklang Majaw uba kam ialade kum u Sordar, nga pynpaw ia ka jingsngew kyndit ban iohi ia ka jingpyrshah jong u ia ki kam pynroi ba la wanrah da u Prof. Rakesh Sinha, u MP jong ka Rajya Sabha bad ruh ia ka jingpyrshah jong u ia ka jingpdiang da u Prof Rakesh Sinha ia ka shnong Kongthong ban wanrah ia shibun ki kam pynroi.”

“Ha ka jingshisha ka Dorbar jong nga u Sordar ryngkat bad ki paidbah nongshong shnong jong ka shnong Kongthong, ngi pdiang sngewbha ia ka jingpdiang jong u ia ka shnong jong ngi khamtam eh ia ka jingkloi jong une u MP ban iarap ban wanrah ia ki kam pynroi hapoh shnong bad ka thaiñ Khatarshnong jong ngi”.

“Na ka Liang jong nga ryngkat u paidbah ngam don kano kano ka jingpyrshah ba un (Prof. Rakesh Sinha) wanrah ia ka jingmyntoi na ka bynta ki paidbah. Ka Dorbar jong nga u Sordar kam judon mynno mynno ruh ban pyrshah ne kyntait ia kino kino ki kam pynroi kiba la wanrah da ka Sorkar kumjuh ruh na ki MLA ne MDC ban iarap ia ka shnong ka thaw. Namarkata, nga pynrem jur ia ka jingkynthoh bad jingpyrshah jong u Sylloklang Majaw ha ki lad pathai khubor,” ong Bah Kanol.

“Ka jingkam u Sylloklang Majaw ba ki paidbah nongshong shnong ki pynpaw ia ka jingpyrshah ia ka jingiarap bad ka jingpdiang jong u Prof. Rakesh Sinha ia ka shnong Kongthong ka long ka bym shisha bad ka bym don nongrim haei haei ruh em. Kane ka long tang ka jingthmu ban khanglad ia ka roi ka par jong ka shnong Kongthong. Kiba pyrshah ki long tang katto katne ngut kiba bud ia u Sylloklang Majaw kiba long ki diengpyngkiang ia ka roi ka par hapoh shnong Kongthong,” ong shuh shuh u Bah Kanol.

“Na ka liang jong nga u Sordar ryngkat ka Dorbar baroh kawei ngi pynpaw ia ka jingsngewnguh bad ka jingsngew burom ia ki nongialam jong ka Indigeneous Agro Tourism Cooperative Society Ltd (IATCSL) Kongthong kiba ju trei shitom ban kyntiew ia ka shnong ka thaw bad ban wanrah ia shibun ki kam pynroi hapoh shnong,” la pynpaw une u Sordar Raid Kongthong.

“Namarkata, ka jingkynthoh jong u Sylloklang Majaw ka long ka bym shisha bad kaba lah pynban ban ialam bakla ia ki paidbah bad ngi pynrem jur ia kane,” la ong u Bah Kanol.

What Next?

Recent Articles

Leave a Reply

Submit Comment

*