Suba ba kiba don ia ka jingpang HIV ha Meghalaya kila don palat 5000 ngut: Dr Ampareen

Shillong, Iaiong 08: Kat kum ka jinglum jingtip jong ka Meghalaya Legislative Assembly Committee on Women Empowerment ,Ka jingdon jong ki briew kiba ioh ia ka HIV bad AIDS ha ka jylla ka la kynjoh sha ka 5000 ngut.

Haba iakren bad ki lad pathai khubor ka chairperson jong ka MLACWE ka Dr Ampareen Lyngdoh ka la iathuh ba kine ki 5000 ngut ki briew ba don ka jingpang HIV/AIDS ki kham bun ha East Khasi Hills District, ia kane la iathuh hadien ba la wai ka jingialang jong katei ka Committee kaba la long mynta ka sngi ha MLA Hostel Shillong.

Ka Dr Ampareen ka la ong ba ka long kaei kaei kaba sngewpang met ban shem ba ki don haduh 5000 ngut ki briew kiba la ioh ia ka jingpang HIV bad AIDS bad na kitei ki 5000 ngut , ki 200 ngut ki dei ki kynthei kiba don ha ka kam die met .

ka Dr Ampareen ka la iathuh ba kine ki 200 ngut ki dei ki ba wan bam register ia lade bad ym lah ban tip ba kin dang bun namar ki don ki thei dei met ki bym kwah ban leh ia ki test.

“Sa kawei ka jingeh ruh ka long ba ka jylla kam don la ka jong ka Testing Laboratory ha kaba ia baroh ki test la hap ban phah shaduh Kolkata ne Guahati bad kane ka la pynslem ban ioh ia ki kaiphot ba donkam”ka la bynrap.

ka la iathuh ba “Ngi la bthah ruh ia ka tnad social welfare bad kumjuh ia ka tnad pulit jong ka jylla ban thaw ki lad ki lynti ha kaba ki briew kiba iaid da ki kam khaii met kin lah ban iehnoh ia katei ka jaitkam bad kin wan phai biang sha ka imlang sahlang kaba bha bad ban lait na kitei ki jait kam ba isaitmet”.

ka la pynpsw ruh ba “Ngim kwah ban kren bein ne pynrem ia kine ki briew hynrei dei ban wad ki lad ki lynti kiba lah ban iarap ia ki namar kane ka jaitkam kam dei kaba beit ba biang na ka bynta jong ki, ki bun ki kynthei kiba la ngat ha katei ka kam khaii met ka daw ka lah ban long na ka jingshah ieh marwei ne ka jingwan na ki longing ba duk ba kyrduh hynrei kane ka kam pat ka long kaba kum ka imlang ka sahlang kam lah ban pdiang”.

Na ka liang jong u Bah HM Shangpliang uwei na ki dkhot katei ka committee u la ong ba kawei na ki jingeh ha kaba iarap ia ki kynthei kiba la ngat ha ki kam khaii met ka dei namar ka jingbym don jong ka jaka sumar ia ki. kiba long kum ki jaka ban ai ka jingiasyllok, ka jingiarap ban lait na ka dih ka bam bad ban ai ka jingsumar ia ki.

U la iathuh ruh ba mynta ki don tang 2 tylli ki shelter home ha ka jylla kawei ha Shillong bad kawei ha Nongstoin bad kine ki iing ruh ki dei lang bad kynthei bad shynrang,ha kaba ka wanrah ka jingeh khamtam ia ki kynthei kiba dei ban ioh ka jaka kaba kyrpang na ka bynta jong ki.

 

 

What Next?

Recent Articles

Leave a Reply

Submit Comment

*