Shillong, Jymmang 23: Ka ophis jong u Deputy Commissioner (Supply), East Khasi Hills District mynta ka sngi la pynmih ia ka hukum ba la pynlait ia u khaw rashon sha ki paidbah na ka bynta kito kiba ioh ia u Antyodaya Anna Yojana (AAY) bad ia u khaw ba ka sorkar kala jer kyteng “Priority House Holds” (PHH) hapoh jong ka skhim NFSA 2013 na ka bynta ar bnai, u Iaiong bad u bnai Jymmang bad kane kan long na ka bynta ha sor bad nongkyndong.
La bthah ia baroh ki dukan jong ki Fair Price shop ba kin leit ban sei noh ia u khaw na ki kudam bad ban sam sha ki paidbah. La bthah ba ia u khaw AAY dei ban sam ha ka dor lai tyngka shi kilo bad ki dei ban ioh 35 kilo. Ha kaba ia dei bad u khaw PHH la ong bas hi khlieh briew ki dei ban ioh 4.977 kilo marwei ha ka dor lai tyngka shi kilo bad na ka bynta kito kiba hap hapoh jong ka Tide Over ki dei ban ioh 0.023 kilo shi khlieh briew ha ka dor T.9.30 tyngka.
La bthah ia ki paidbah ba lada don ki bymioh ia u khaw ki dei ban pyntip sha ka ophis jong u Deputy Commissioner Supply. Ha kine ki sngi na ka liang jong u SP News Agency u la thoh ia kane ka khubor haba ka sorkar jylla kala dep sei na ki kudam jong ka FCI na ka bynta lai bnai sha ei ka buh. Ha kane ka jingpynliat khaw jong ka sorkar mynta kala pynlait tang ar bnai.
