Shillong, Jylliew 04: U myntri rangbah ka jylla mynta ka sngi u la lum ia ka jingialang jong ka sorkar Meghalaya democratic Alliance (MDA), u la lum ia ka jingialang jong baroh ki seng sain pyrthei, ia ka synjuk ki Nongsynshar Shnong bad u la ia kynduh ruh ia ki nongdie madan bad kine ki jingiakynduh baroh ka long ban ia kren kumno ban wanrah biang ia ka jingsuk ha kane ka nongbah Shillong.
Ha dien kitei ki jingialang baroh kiba la long mynta ka sngi, u myntri rangbah haba kren ha ki nongthoh khubor u la ong ba “Kum ka sorkar kala kut jingmut ban peit bniah ban pynkynriah ia ka sweeper Colony kaba don ha Them Motor, ban leh ia kane ka sorkar kala thaw i aka High Level Committee (HLC) ka ban khlieh da u symbut myntri rangbah ka jylla u Bah Prestone Tynsong, kiwei ki dkhot ki long u bah AL Hek, Bah Hamletson Dohling, u James K Sangma baroh ki myntri cabinet, u CEM jong ka KHADC bad u Secretary jong ka Committee un long u Bah DP Wahlang.”
U Myntri rangbah la ong ba ka kamram jong kane ka Kommittee ka long ban peit na ka liang jong ka ain, na ka liang jong ka histori ha kaba ia dei bad katei ka jaka. Na ka liang jong u myntri rangbah u la kyntu ia ki nongiakhih ba kin pynkut noh ia kane ka jingiakhih ka jong ki namar ka sorkat kala shim khia ban pynbeit ia kane ka jingeh. U la ong ba ka jingiakhih kan nym wanrah ei ei hynrei don kam ban ia kren ban weng ia ki jingeh.
U myntri rangbah u kyntu ia baroh ban ia trei lang n aka bynta ban wanrah ia ka jingshong suk ha kane ka nongbah Shillong. U la myntri rangbah u la ong ba kane ka jingiakhih kala ktah ia baroh ki briew, la ki long ki nongshong dukan lane ki nongbylla sngi, kane ka jingiakhih kala ktah ia baroh, u myntri rangbah u da kyrpad jur ia baroh to ban ia treilang ban wanrah ia ka jingshong suk.
U Myntri rangbah u la iathuh ba ki paidbah ki dei ban ngiet ia kaei kaba u myntri rangbah u la iathuh ba ia u ba don kti ha kaba soh briew la kem bad ka kyrteng jong u u dei u B. Misa mynta u don ha kti ki pulit ba mynta la pynkhreh ban pynngat ia u ha ki kyndon jong ka ain. La iathuh ba mar ia jai katei ka jingjia u la kren ia u myntri kam poh iing jong ka Ri India bad kum juh ia u myntri rangbah ka jylla Punjab.
