Shillong, Kyllalyngkot 12; Ka kong Anita Synrem mynta ka sngi kala pynbna paidbah ba kan ia khun ia kane ka MLA Election ka ban long shen hapoh ka jylla Meghalaya kum ka kyrtong shimet napoh jong ka 14-Pynthorumkhrah Constituency.
Haba kren ha ki nongthoh khubor mynta ka sngi ha Shillong Press Club ka kong Anita kala ong ba ka long kaba don kam ia ki kynthei ba kin mih sha khmat ban ia shim bynta ha ka election. Ka long ba kala juh kren man ka por ban ia bor ia ki kynthei bad mynta ka mih sha khmat ban long ka nuksa ha kane ka jingialeh.
Haba jubab ia ki jingkylli, ka kong Synrem kala ong ba ban trei na ka bynta ki paidbah ka kham lah kum ka kyrtong shimet namar la da don ha ki party ki hap ban bud ia ki kyndon jong ki parti ha kaba ym lah ban trei laitluid katkum ka jingsngew ia kaei kaba dei ban leh.
Kala ong ba ka jingiohi jong ka ka long ba ka 14-Pynthorumkhrah Constituency ka dang sah dien sha ba palat khamtam eh ha ka liang jong ki nala um, ka jingjaboh ka long kaba la palat ka jingbym biang ki light ha surok bad ban ia khun pyrshah ia ka jingpep skul ba khlem pat dei por jong ki khynnah.
Haba phai ha ka jingiadei bad u MLA ba mynta u bah AL Hek, ka kong Synrem kala kynnoh ba u dei u khwan myntoi namar u la iohi ba ka Congress kam wan shuh ha ka bor u leit biang sha ka BJP. Ha kine ki saw sien kiba u la jop ka Pynthorumkhrah kam shym don kano kano ka jingkiew hapoh jong ka Konstitwensi.
