Shillong, Nailar 06: U General Secretary jong ka Kiang Nangbah Government College, Jowai u Bah J P Lyngdoh u la phah ia ka jingujor sha u myntri ka sorkar pdeng ba dei peit ia ka pule puthi ha ka Ri ia ka rukom thung principal jong ka sorkar Meghalaya ha ki College sorkar ha kane ka jylla, khlem da bud ia ki kyndon kiba la buh da ka University Grant Commission.
Ha kane ka shithi jingujor kaba la phah mynta ka sngi, na ka liang jong u Bah Lyngdoh u la ong ba ki college kiba dei jong ka sorkar ha kane ka jylla ki don hynriew tylli baroh, ka Tura Government College, ha Tura hapoh jong ka West Garo Hills District, Kiang Nangbah Government college Jowai, ha Jowai West Jiantia Hills District, College of Teachers Education, Rongkhon, ha Rongkhon West Garo Hills District, Sohra Government College, ha Sohra, East Khasi Hills District, Captain W A Sangma Government College Baghmara, ha Baghmara South Garo Hills District bad ka Williamnagar Government College, ha Williamnagar East Garo Hills District”.
Ha kane ka shithi kaba la phah sha u myntri ba dei peit ia ka HRD, u Bah Lyngdoh u la ong ba ka rukom thung jong ka sorkar jylla ia ki principal hapoh ki college jong ka long katkum ka jingtrei slem jong ki nonghikai, khlem da bud ia ki kyndon kiba la buh da ka UGC jong ka sorkar pdeng, dei halor kane ka rukom ba ki principal ha ki college jong ka sorkar jylla ki don ha ka kam tang hapdeng lai bnai bad hynriew bnai.
Na ka liang jong u Bah Lyngdoh, u la ong ba u la thoh ia kane ka jingujor sha u myntri jong ka HRD da ka jingsngewkhia namar ba la kumno kumno u principal u dei ban don ha ka kam lai kumno kumno ar lane lai snem ne palat ia kata. Ha kane ka shithi la iathuh ba ia mynta u Bah Lyngdoh u dang pule hapoh jong ka Kiang Nangbah Government College ha ka semester kaba lai, hynrei u la iohi ba lada don ha duh ar ngut ki principal u ba mynta ruh un shong thait noh mynta u bnai ha kaba u la don ha kane ka college tang san bnai.
Ha kaba ia dei bad ka jingthung ia ki principal hapoh jong ki college sorkar, haduh mynta ka tnad pule puthi jong ka sorkar Meghalaya ka Directorate of Higher and Technical Education, kam shym la but satia ia ki kyndon kiba la buh da ka UGC ha kaba ia dei bad ka jingthung ia ki principal ha ki College sorkar.
Na ka liang jong u General Secretary jong ka KNGCSU u la dawa na u myntri jong ka sorkar pdeng ba dei peit ia ka HRD ba un skhim khia ban pynbeit lem ia kane ka jingleh na ka bynta ka jingbit jingbiang jong ki samla pule jong kane ka jylla kiba pule ha ki college jong ka sorkar ban hukum ia ka sorkar jylla ba kan but ia ki kyndon jong ka UGC hakaba thung ia ki principal ha ki college ba la pyniaid da ka sorkar.
