Shillong, Nohprah 17: U Con
rad K Sangma MP jong ka Tura u la ujor sha u myntri kam poh iing jong ka Ri India u Rajnath Singh bad shu myntri khynnah kam poh iing jong ka Ri India u Kiren Rijiju halor ka jingshah shoh jong ki phadar bad ki khynnah pule phadar ha ka jylla Madhya Pradesh.
Ha kane ka jingujor na ka liang jong u Cornad u la ong ba kane ka jingjia kala jia ha ka 14 tarik mynta u bnai katba ki dang pynlong ia ka jingiaid Karol leh kmen Khristmas, ia kane ka jingjia la pyntip da u Bishop Theodore Mascarenhas, SFX, Secretary General Catholic Bishops’ Conference of India mynta ka sngi.
Na ka liang jong u Cornad u la ong ia u myntri kam poh iing jong ka sorkar pdeng bad ka sorkar pdeng ka dei ban ia kren bad ka sorkar Madhya Pradesh ban pynshitom ia kiba don kti ha kane ka kam kat kum ka ain jong ka Ri. Ka sorkar pdeng bad ka sorkar jylla ka dei ban kem mar dor ia ki briew kiba don kti ha kum kine ki jaid kam.
Na ka liang jong u Cornad u la ong ruh ia u myntri rangbah duh jong ka Ri ba ka sorkar jong u ka dei ban tem shi syndon ia kum kine ki jingjia ban thombor ia ki Khristan, bad kane ka jingbethah ka dei ban mih na ka ophis jong u myntri rangbah duh jong ka Ri ban ai ka jingiada ia baroh ki jaid niam katkum ka Riti Synshar jong ka Ri.
