Shillong, Jylliew 18: Ka jingshim rai ban ai jingmyntoi ia ki briew kiba don sap ne kiba ladep pyntbit ha ka kam kiba kham duna ha ka ioh ka kot ha ka imlang sahlang, ka tnad shna surok jong ka sorkar pdeng ka la rai ban weng ia ka jingdonkam jong ka kyrdan pule ba duna eh ban niah ia ki kali kit tiar .
Hapoh ka Rule 8 jong ka Central Motor Vehicle Rules, 1989, u nongniah ia ki kali kit tiar ne kit mar u donkam ban pass ne ban pyllait ia ka class 8. Hynrei, ki don shibun ki briew ki bym don kam don jam khamtam ha ki thain nongkyndong jong ka ri, kiba lah ban nym don ia kata ka kyrdan pule kaba duna eh, hynrei kilong pat kiba stad bad kiba don sap.
Ha ka jingialang ba dang shen jong ka Transport Ministry, ka sorkar Haryana ka la kyrpad ban weng ia ka jinglong ha ka kyrdan pule jong ki nongniah kiba dei na ka thain Mewat kaba dang sahdien ha ka ioh ka kot ha kaba ki nongshong shnong ki shaniah ia ka kamai kajih ha kam kaba duna jingioh ba kynthup ruh ia ka kam niah kali.
Ka sorkar jylla ka la pyntip ba ki don bun ki briew ha ka thain kiba don ia ka sap kaba donkam hynrei kim biang pat ha ka kyrdan pule ba la pan, bad kumta ki shem jingeh ban ioh license ban niah kali. Kumta ka la don ka jingsngew ba ka kam niah kali ka kham donkam ia ka sap ban ia ka kyrdan pule.
Ka jinglong jong ka kyrdan pule ba duna eh kalong kum ka jingkhang lad ia ki briew khamtam ia ki samla kiba la bit la biang ki bym don kam don jam. Ka jingweng ia kane ka jingdonkam kan plie lad ha ka ioh kam ioh jam ia kiba bun ki briew ki bym don kam don jam, khamtam ki samla ha ka ri.
Ym tang kane, ka ka rai kan iarap ruh ban iakynduh ia ka jingduna kaba jan kumba 22 lak ki nongniah ha ka transport bad ki bynta ba iadei bad kane, kaba khang lad ia ka jingkiew jong ka.
Hynrei, haba weng ia kane ka jingdonkam jong ka kyrdan pule ba duna eh, ka Ministry ka la ban jur halor ka jingai jinghikai bad ban test ia ka sap jong ki nongniah khnang ban nym iapein ia ka jingshngain ha kano kano ka rukom. Kino kino ki briew kiba aplai ia ka license niah kali ki dei ban pass ia ka sap niah kali kaba pyrkhing bha.
Ka Ministry ka la ban jur ba ka jingai jinghikai ba la ai da ka skul lane kiwei kiwei ki jaka pule kumba la kdew ha ka Motor Vehicels Act 1988 kidei ban pynthikna ba u nongniah u dei ban lah ban pule ia ki dak bad leh ia ka kamram kaba dei kum ka jingpyndap ia ka dairy, ban peit ia ki trok bad ki trailer, ban ai ia ki jingtip shuwa ban mih ha lynti bad hadien ba la poi sha ka jaka ba dei leit.
Ka jinglah ban ithuh ia ki jingbakla ha ki jingthoh, ka jinglah ban batai shai halor ki jingma ba iadei bad ka jingshngain. Shuh shuh ki skul bad kiwei kiwei ki jaka pule kiba ai jinghikai kin hapoh ha ki kyndon ba la thaw da ka sorkar jylla. Kumta, ka jingai jinghikai kadei ban long kaba bha ba kynthup ia baroh ki bynta jong ka jingniah ia manla ki jait kali.
Lah ruh ban kdew ba ka Supreme Court, ha ka hukum jong ka kaba ha ka 3 tarik Naitung, 2017 ha Civil Appeal No. 5826 of 2011 – Mukund Dewagan Vs. Oriental Insurance Company Limited & Ors., kaba iadei bad ka jingai license ia ki kali rit (light motor vehicles), ka la rai ba ka license na ka bynta ka jingkit tiar (Transport) kan nym donkam lada kidei ki kali kit tiar ba rit.
Ka Ministry ka ladep tyrwa ban weng ia ka jingdonkam jong ka kyrdan pule ha ka Motor Vehicles (Amendment) Bill kaba la ioh ia ka jingmynjur na ka Lok Sabha kaba la dep.
Ia kane ka phang la pyrkhat sani bha da ka Standing Committee bad ka Select committee jong ka Parliament. Ha kaba iadei bad katei haneng ka Ministry of Road Transport & highways ka la sdang ia ka kam ban wanrah ka jingpynkylla (amendment) ia ka Rule 8 jong ka Central Motor Vehicles 1989 bad ia ka draft notification halor kane shen yn sa pynmih.
