Shillong, Nailar 31: Mynta ka sngi kala don ka jingiakynduh hapdeng ka sorkar bad ki kynhun seng bhalang kiba kyrshan bad kiba pyrshah ia ki surok kiba dei sha South West Khasi Hills District, kaba ki paidbah ki tip bha. Ha kane ka jingialang kam shym la poi ha kano kano ka rai bad la pynkut noh ia ka jingialang da kaba shim ia ka rai ba kin dang ia bteng biang ia kane ka jingiakren.
U Myntri rangbah u Dr Mukul Sangma, ha dien ka jingialang u la ong kane ka jingialang kaba la long mynta ka sngi ka dei ka jingbeteng ia kaei kaba kila ia kren mynshuwa, namar ka don ka jingsngewthuh bakla ha kaba ia dei bade ki surok ba ka kam tih Uranium.
U myntri rangbah u la ong ba ka sorkar ka ieng skhem ba ka kam tih Uranium, ka sorka kan nym ailad khlem ka jingmynjur lang jong ki paidbah, kane ka long shai haba ia dei bad ka nongrim b aka sorkar ka ieng, Ka sorkar jylla kan nym shah la ka long ban tih ne sdang ha ka kano kano ka bynta bad ia dei bad u Uranium khlem da pdiang u paidbah.
Ha ka juh ka por ha kaba ia dei bad ki surok, kane ka skhim ka wan na ka jingmang pisa kaba kyrpang jong ka sorkar pdeng na ka bynta ka dong shatei lam mih ngi baroh kawei, bad kum juh ha kane ka jylla Meghalaya, ka sorkar ka kwah ba kin surok kin long kiba bit baing ha kane ka jylla lyngba kine ki skhim kiba wan na ka sorkar pdeng.
Ha kane ka jingiakynduh mynta ka sngi kila ia kren shibun halor kane ka bynta na baroh ki liang, la ka dei na kito ki liang kiba pyrshah ne kiba kyrshan bad kum juh na ka sorkar halor kine ki surok bad ha dien ka jingiakren kaba la neh kumba ar kynta tam kamshym la poi ha kano kano ka rai bad la pynkut noh ia ka jingialang ba kin dang iai beteng ia kane ka jingiakren.
