Shillong, Jylliew 28: ka shillong Municipal board mynta ka sngi ka la leit ban pynpra ia ki dukan ha iew polo namr kane ka jaka ka dei jong ka sorkar bad la kynnoh ba ki paidbah kiba shong die jingdie ha katei iew ba ki shong beain.
U Bah E. Kharmalki, Chief Executive Member (CEO) ka Shillong Municipal Board (SMB) haba kren sha ki nongthoh khubor, u la ong ba ka jingpynpra ia kine ki dukan ka long lyngba ka hukum ba la wan na ka Ingbishar jong ka jylla ha u bnai Jymmang, mynta u snem.
U la ong ruh ba ka jingiakhun jong ka Sorkar ban ioh pynpra ia kine ki dukan ha kane ka iew ka long ban ioh tei noh da ka Shopping Complex kaba khamheh bad kaba kham kylluid.
“Ka Shillong Municipal Board ka la pynkynriah ruh shipor ia ki nongshong dukan hapoh kane ka Iew sha ki dukan thymmai kiba don hajan kane hi ka Iew, hynrei ki baroh ki la wanphai biang ban shong ha ki dukan rim hapoh kane ka Iew hadien ba ka la don ka jingiakren sngewthuh ba kin sa mih noh ynda la ka Municipal ka la wan pynpra ia ki dukan,” ong u CEO.
U la ong ruh ba ka jingpynpra ia kane ka dukan ka long kaba iaid beit khlem kano kano ka jingshah pynthud. bad shwa ban wan pynpra ia kine ki dukan hapoh kane ka Iew, ki bor ka Municipal ki la wan jurip bad phah ruh ia ka notis ba ki nongshong iew kin hap ban mih noh namar ba ka Municipal kan pynpra ia kane ka Iew ban shna thymmai noh da ka Shopping Complex.
U bah Pynsuklang Hynniewta u ba long u secretary jong ka greater Iew Polo haba kren bad ki nongthoh khubor mynta ka sngi u la ong ba ia kane ka jaka lah don kumba ar snem ka jingiaknieh hapdeng ka Municipal bad ki paidbah kiba shong ha ka tei ka iew hynrei ka iing bishar kam pat lah ban rai ka la shu sah teng, hynrei mynta ka kynti ka Municipal ka al jop ia ka tei ka case.
Ka jaka ha ka tei ka iew baroh ka don 2000 sq phut bad ia kane ka iew la shna na duh ki por jong ka sorkar Assam, ha kaba nyngkong ka dei ka jaka jong ki briew shimet, hynrei hadien ia ka tei ka jaka la shim noh ki Municipal bad ka al dei ka jaka jong ka Municipal, la ong u bah Pynsuklang.
Ki dukan baroh kiba don ha ka tei ka iew ki long 433 tylli ki dukan kynthup ia ki dukan jogn ki Khasi bad ki dkhar bad ki ba bun ki dei ki dukan jong ki khasi, na ki tei ki 433 tylli hynrei tang 62 tylli ki ban ioh na ka SMB ban shong ha ka iew thymmai.
U bah Hynniewta u la ong ruh ia ka tei ka iew jong ka sorkar ka ban sa tei ha ka tei ka jaka yn pyndep ha ki ar snem bad u la ong ruh na ka liang ka jong ki ki kyrpad ia ka sorkar ba kan pyndei kham kloi bad leh kham sted ha ka ban shna ia ka tei ka iew khnang ba ki paidbah kin ioh ban bteng biang ia ki kam ki jong ki.(SP News)
