Shillong, Iaiong 24: Hadien ba ka jingsieh lama iong ha baroh ki skul kiba ioh jingiarap lyngba ka Sarva Shiksha Abhiyan (SSA) kiba don kumba 5000 hajar tam hapoh ka jylla kaba la sdang naduh 19 tarik mynta u bnai kala kut noh mynta ka sngi, u bah Aristotle C. Rymbai President ka Meghalaya SSA School Association (MSSASA) Sengkmie u la pyntip ba ka jingiakhih kaba bud da kaba shah thnang lai sngi lynter kaba mut ban pynlong naduh ka 26 tarik haduh 28 tarik mynta u bnai la pynsangeh shwa ia mynta.
Ka Synjuk ka shim ia kane ka rai hadien ba ka report halor ki jingdawa jong ka synjuk kaba kila ioh pdiang lyngba ka RTI ha ka 24 tarik mynta u bnai ka kdew ba ki kam ki iaid beit kumba la iakren bad ki ophisar jong ka tnat pule puthi, ong u bah H.M.Marbaniang General Secretary ka MSSASA Sengkmie.
U bah Aristotle C. Rymbai u iathuh ba katkum katei ka report ba la ioh na ka ophis jong u State Project Director, SEMAM uba long ruh u Director ka School Education and Literacy, ka tnat pule puthi ka pynpaw shai ba kumba ka long mynta ka pisa kaba la don lypa bad ka sorkar jylla ban siew ia ka tulop thymmai bad arrears jong ki 12481 ngut ki nonghikai SSA naduh ka 1 tarik Iaiong 2016 ka long 21.84 crore.
Ha ka juh ka por ka sorkar ka dang ap mynta ia ka 2nd Installment na ka sorkar pdeng khnang ban ioh ban pyllait noh ia katei ka tulop thymmai bad arrears kaba sorkar jylla ka donkam kumba 100 crore tam kumba la dep mang bad mynjur da ka Project Approval Board (PAB) 2016-17 jong ka tnat Human Resource Development (HRD) ka Sorkar pdeng.
La ioh pdiang ruh ia kiwei kiwei ki kot ki sla kiba pynpaw ba kiwei kiwei ki jingdawa jong ka synjuk kiba kynthup ia ka jingpynkiew tulop ia u 4th Teachers , ka result Diploma in Elementary Education (D.El.Ed) bad kiwei kiwei ki iaid beit kumba la iakren bad baroh kine ki report ka synjuk kan sa wanrah ha ka general meeting ka ban sa long shen ha nongbah Shillong bad ban shim ia ki jingai jingmut jong baroh ki nonghikai SSA bad 4th teachers shwa ba ka synjuk kan shim sa kiwei pat ki sienjam, bynrap shuh shuh u bah H.M.Marbaniang.
Ka synjuk kan sa leit iakynduh ruh ia ka Deborah Marak myntri ba peit ia ka School Education and Literacy bad kumjuh ruh ia ka Roshan Warjri myntri ka Higher bad Technical Education ka sorkar jylla ha kine ki sngi ban wan. La ong u Bah Aristotle Rymbai president ka seng MSSASA.
