New Delhi, Nailar 23:Ka kam shna phlim ka dei ka kam kaba don ka bynta kaba khraw ha ka GDP jong ka India. Namar ka khlam COVID-19, ka long kaba donkam ba ki briew kiba iadei bad kane ka kam ki shim ia ki sienjam ban iada na ka jingpur kane ka khlam katba ki dang bteng biang ia ki kam jong ki.
Ka tnat I&B, ha ka jingiatrei lang bad ka tnat ka Koit ka khiah jong ka Sorkar Pdeng, ka lah pynkhreh ia ki kyndon bad ki Standard Operating Procedure (SOP) halor ki lad iada na ka bynta kito kiba trei ia ki kam shna phlim bad ia kine lah pyllait da u Myntri Sorkar Pdeng ba dei peit ia ka tnat Information & Broadcasting, u Prakash Javadekar ha New Delhi.
Ki mat ba kongsan ki kynthup ia ki sienjam kiba lah pyllait da ka tnat ka Koit ka Khiah jong ka Sorkar Pdeng kiba kynthup ruh ia ki sienjam kum ka jingpakhang ia ki kam ki bym kongsan ha ki jaka ba lah ithuh kum ki containment zone, ka jinghusiar ba kham kyrpang na ka bynta kito kiba kham don ha ka jingma, ka jingpyndonkam ia ki jingda khmat, ka jingsait kti ba man ka por, ka jingpynbiang ia ki hand sanitizer bad ka jingbat ia ki akor ha kaba iadei bad ka jingpynhiar mynsiem khamtam ha ki kam shna phlim.
Ka tnat ka lah wanrah ia kine ki SOP da kaba kynmaw ia ki jingleh ha kiwei kiwei ki ri kaba kynthup ia ka jingpynjngai iwei na iwei, ka jingpynbiang ia ki jaka rung bad jaka mih ba kyrpang ha ki jaka ring phlim, ka jingpynkhuid, ka jingshngain jong ki nongtrei, ka jingpynduna ka jingiakynduh briew bd ka jingbud ia ki kyndon kiba iadei bad ka jingleit jingwan kumba lah bthah da ka MHA kaba kynthup ruh ia ka jingpynsah marwei.
Ha kaba iadei bad ki jingda khmat, kumba leh ha kiwei kiwei ki ri, ia kine lah buh kyndon ba ym lah lait ha kaba ki baroh ki briew kiba trei ha ki kam shna phlim ki hap ban pyndonkam ia ki jingda khmat lait noh ia ki actor katba ki dang don hakhmat ki kor jingring phlim.
