Shillong, Nailar 28: Mynta ka sngi ka seng congress ha ka Ri India baroh kawei kala pynlong ia k
a jingiakhih kaba jar jar ban pyrshah ia ka sorkar NDA halor ka jingthmu ban pynlong ia ka eksamin JEE bad NEE ha ka Ri India baroh kawei.
U bah James Lyngdoh Working President ka MPCC u la ong ba ha Meghalaya ka seng kala pynlong ia ka jingiakhih ha Congress Bhavan da kaba jar jar bad ruh ia kip la kard ban pynpaw ia kane ka jingpyrshah ban pynlong ia ka eksam, ka jingpyrshah ka long ba kam long kaba shngian namar ka don kane ka khlam COVID-19.
Ka jingpyrshah jong ka party Congress ka long ba bun na ki samla pule kiba kwah ban ia khun ia kane ka eksam kin nym ioh lad namar kam biang ka leit ka wan, kaba ar ka long ba lada long online ruh ka internet kam biang wat ha ki jaka sor ruh bad ban pynlong eksam ha kaba bun ki samla kin hap ban poi ha kawei ka jaka ka long ka jingma ia ka koit ka khiah.
U bah Banshailang Pyngrope President ka NSUI jong ka Meghalaya u ong ba kim pyrshah ia ka jingpynlong eksam hynrei ki pyrshah ia ka rukom pynlong eksam. Ha Meghalaya kila buh tang kawei ka jaka bad kata kan long ha NEHU, kane kan buh jingeh ia ki samla kiba kwah ban ia khun ia kane ka eksam.
Lada ka sorkar NDA ka don jingthmu na ka bynta ka jingmyntoi jong ki samla pule khamtam ia ki rit paid kiba iakhun ia kane ka eksam JEE bad NEE na ka bhah kaba la long ia ki kala dei ban pynlong ia kane ka eksam ha ki headquarter jong ki District ha kaba ki samla ki lah ban leh ia ka eksam jong ki da ka online bad ha ka juh ka por da ka off-line.
Ha kane ka jingiakhih ba jar jar mynta ka sngi la don lang ruh u MDC ka seng u bah Bajop Pynprope, ki seng long kmie bad kiba bun ki dei ki samla pule na ka NSUI jong ka seng Congress.
