Shillong, Rymphang 18: Ka Meghalaya State Kickboxing Association [MSKA] hynnin ka Sngi Saitjaiñ jong ka taïew ba ladep, ka la pynlong ïa ka program pdiang burom ha Hotel Assembly, Khyndai Lad.
Kane ka jingpdiang burom ka long na bynta ki nongïalehkai Kickboxing kiba la wanrah nam ym tang ïa ka jylla hynrei ïa ka Ri hi baroh kawei hadien ka jinglah jong ki ban khur takma na ka 3rd WAKO Indian Open International Kickboxing Tournament 2024 kaba la long ha nongbah New Delhi.
Ki la don haduh 10 ngut ki nongïalehkai Kickboxing na ki kynhun kum ka Team Revolution, Tribal Combat, Aireng MMA-Club n Mawlai kiba la phah hapoh ka lama jong ka MSKA ban leit ïashimbynta ha katei ka lympung ha nongbah New Delhi, bad napdeng kitei ki shiphew ngut, 8 ngut ki la wanphai ryngkat bad ki takma kiba kynthup lai tylli ki takma ksiar, lai tylli rupa bad ar tylli ki rnong.
Ha kane ka sngi pdiang burom la ïadonryngkatlang u President ka synjuk-u Bah Lorenzo P Warjri, u Bah Sam Lyngdoh na ka Team Revolution lem bad ki samla kiba la khur takma na katei ka lympung.
Haba ai jingkren, na ka liang jong u Bah Lorenzo u la pynpaw ïa ka jingsngew sarong na bynta kine ki phra ngut kiba la seisoh ha katei ka lympung bad ai mynsiem ïa ki ar ngut ki bym shym la poi sha ka thong ba kin nang trei shitom ban pyntbit shuh shuh ïalade.
“Ki khynnah Northeast kynthup ruh ïa ka Meghalaya khamtam ruh ïa ka Manipur, ki don ïa kata ka sap kaba ki ong ka ‘National Talents’ ha ka Martial Arts, ka dei ka sap kaba u Blei u la pynkup ha phi, lada phi pyndonkam hok bad trei shitom ban pynjanai shuh ialade kan long ka jingkyrkhu ïa phi,” la ong u Bah Lorenzo.
Na ka liang jong u Bah Sam u la ong, “Ka long ka jing sarong ïa ka jaidbynriew, namar ngi ïohi ba katei ka lympung ka dei ka rynsan ïakhun International ha kaba bun ki nongïalehkai na kiwei pat ki ri kum ka Uzbekistan, Turkey, Iraq bad kiwei kiwei ki wan ban ïashimbynta, te ki samla ka jylla ki hap ban pynkhreh bha ïalade, bad kumba ka paw napdeng 10 ngut phra ngut ki la ïoh kheit ïa u soh ka jingjop”.
Nalor kine ki phra ngut kiba la jop takma, ka jingsarong ka long ruh na bynta u Samla Shaiborlang Lyngdoh Mawphlang u ba la pyntbit ïalade ha ka kam Referee bad u la ïoh ruh ban kiew shaduh ka kyrdan International Referee ha ka jingïalehkai Kickboxing.
Kumban shu pynkynmaw, ka 3rd WAKO Indian Open International Kickboxing Tournament 2024 ka la sdang naduh 7 tarik Rymphang haduh 11 tarik Rymphang, bad la pynlong ha Kd Jadhav indoor stadium kaba ha New Delhi. U Albanrilang Pearson Mylliem Umlong u la long kum u Team Coach ka kynhun katba u Banpynkhraw Warshong kum u Team Coach.
Kiba la ioh ia ka Takma Ksiar ki long, Pynshraiñmiki Rabon (K1 Rules – 71 SM) Donbok Nongrum ( K1 Rules – 57 OJ) Rishanskhem lipon( K1 Rules – 51 OJ).
Kibala ioh ia ka takma Rupa ki long, Wanraplang khongsit (K1 Rules – 57 OJ )Thangoulian ( K1 Rules – 67 OJ) bad kiba la ioh ia ka tkma rynong ki long, Tosanhame N Marweiñ ( Low Kick – 51 OJ) Indahun Iawphniaw ( Low Kick – 48 SF) Ibankyntiew Iangrai ( Kick light – 50 OC)
