Shillong, Jymmang 30: Ka Bouncers Association of Meghalaya (BAM) kum shi bynta ban rakhe ia ka jingdap 20 snem jong ka kynhun, ka la rai ban pynlong da ka jingia mareh marathon kaba 7 kilometer halor ka phangpdeng “Run for Environment – Run for a Cause”.
Ia kane ka jingmareh thong na ka liang ka BAM ka la rai ban pynlong ha ka 5 tarik Jylliew 2024, ha ka por 7:00 baje mynstep. Ka jingiamareh kan sdang na lad Iewsier, Mawtnum, Ri-Bhoi bad pynkut hajan gate jong ka skul Nepali Secondary School, Nongpoh, Ri-Bhoi District.
Ha ka kyrwoh ba la phah da u President jong ka BAM u bah Junestar Kharbuli u la pyntip ba ka jingthmu ban pynlong ia kane ka jingmareh thong ka long ban rakhe ia ka sngi burom kyrpang ia ka Mei Mariang lane ka World Environment Day.
Kane ka long ba ka seng kan rakhe ruh ia ka sngi burom kyrpang ia ka jingia mareh lane ka Global Running Day. Kumjuh ka jingthmu ban pynlong ia kane ka rynsan mareh kan long ruh ban pynsngewthuh lane pynshai paidbah ia ka jingkordor jong ka jingdonkam ban burom bad iada ia ka mei mariang.
Kum ki nongshong shnong bapher bapher bad ban phikir ia ka khnang ba u bynriew un ioh ia ka jingkoit jingkhiah kaba bit ba biang. Te kumta ia kane ka jingia mareh thong yn pynkut da ka jing thung ia ki dieng ba bun jait ryngkat bad ki shyieng/tynrai sohpieng.
Kyrpang ka kynhun ka buh ka jingiawer paidbah katlah katiai ia phi baroh ki ban ia shim bynta ha kane ka rynsan khnang ba kan long ka jingiarakhe sngi kyrpang ia ka mei mariang bad ka jingiamareh kaba jop bad kaba sah kynmaw.
Ki nongjop kin ioh khusnam da ka pisa, medal bad certificate. Yn don ruh ka jingai khusnam ba kyrpang ia ki nong shim bynta ba khynnah tam bad ba heh rta tam.
Phi lah ban tip kham bniah lane register lane phone lyngba kine ki number 6909110529/7005861828/8837201365. Kumjuh ruh ka jingshim kyrteng ia ki nongshim bynta kan long ruh ha lane shwa ka 4 tarik Jylliew 2024.
