Shillong, Nailur 04: Ka jingkynnoh pyrshah ia u symbut myntri rangbah ka jylla ka long kaba khlem nongrim bad ka byn don nongrim haei haei ruh, ha ka kyrdan jong u nongialam un ong ia kum kitei ki ktien, la ong u myntri rangbah ka jylla u Conrad K Sangma.
Kane ka jingkynnoh kaba khlem nongrim ne khlem don ki sakhi satar ka long kaei kaei kaba ym lah ban pdiang, u nongkynnoh ba ia dei bad ka kam drok ka long pyrshah ia ka imlang sah lang bad ka long pyrshah ia ka ri ruh.
Na ka liang jong ka sorkar kala shim bun ki lat ki lynti ban ia khun pyrshah ia kane ka jingsniew bad ka sorkar kan dang pynmih shuh ia ki rukom trei kam ba pynthikna bay n lah ban ia khun pyrshah ia u drok.
La ong ba ka sorkar kan sa pynmih ia ka jingbthah ban don ia ki kommitee ha baroh ki district ban kynthup lang ia ki nongpyniaid shnong ban ia khun pyrshah ia u drok ha ka jylla bad ki dong.
Kane ka kommittee kan nym long eh tang ban ia khun pyrshah ia u drok hynrei kin peit ruh ha ka jingpyntrei kam ia ka MRSSA, ban peitia ka jngkhuid jingsuba bad kum juh haba ia dei bad ka um bam um dih.
Kane ka committee kan sdang shuwa na Shillong, Jowai bad Tura namar ka jingiakhun pyrshah ia u drok ka ei ka thong kaba ha khmat eh jong ka sorkar, ka jingkynnoh ka long ka bym don nongrim bah ka long kaba sngewsih ban ioh ba ha ka kyrdon jong ki kin kynnoh ia kiwei kumne.
Ka jingwan jong ki lai ngut ki MLA sha ka NPP ka long ba kila duh ia ka jingsha niah ia ki nongialam la ka jong ka party jong ki bad ka jingwan jong ki ka long na ka bynta ki kam pynroi kaba ka NPP kala trei bad ki kwah ban don lang hapoh ka sorkar.
Lada ka don ka jingkynrum kynram hapoh ka party NPP kin nym wan, halor ka jingdon ia u number, u myntri rangbah la on ba u don kata ka jingsngewnguh ia baroh ki party kiba la don lang kum ka BJP, HSPDP bad ka UDP ruh kum juh kiba la kyrshan ia ka Sorkar.
