Shillong, Nailur 04: U Myntri Rangbah ka jylla u Conrad K Sangma mynta ka sngi la ong ba ka sorkar pdeng kala shah ia baroh ki jylla ha ka Ri India ba kin shim ram haduh 4% na ka jingmih jong ka jylla ha ka ioh ka kot.
Kaei kaba ka jylla kala shim haduh mynta ka dang long tang 3.75% kaba mut hapoh ka kyndon bala buh da ka sorkar pdeng, lada ka sorkar ka kwah ban shim palat ia kaba buh kan nym lah dalei lei ruh em.
U la ong ba ka mang tyngka jong ka jylla Meghalaya mynta u snem 2024-2025 ka long T.27,000/- klur tyngka, na katei, ka sorkar kan ioh na ka bhah jong ka sorkar pdeng kan long T.10,000/- klur tyngka, na ki khajna kiba ka jylla ka lum ka long T.4000/- klur tyngka.
Na ki khajna kiba la lum da ka sorkar pdeng bad ia sam bad ki sorkar jylla ka Meghalaya kan ioh, T.6509/- klur, na ka Grant kaba ka jylla kan ioh na ka sorkar pdeng kan long T.3000/- klur bad ka jingbit kaba ka sorkar jylla ia mynta u snem ka lah ban shim ram ka long T.3000/- klur.
U myntri rangbah u la pynshai ba ka ram kaba wan na ka Wold Bank ka dei kaba shim ka sorkar pdeng bad 80% la ai sha ki jylla ha ka dur jong ka grant, hynrei ka sorkar jylla ka hap ban sei hi 20% lada kwah ia ki skhim ban shna kum ki surok, ka sorkar jylla kam don kam siew ei ei.
La pynshai ba haduh mynta ka sorkar jylla kam pat pynkhein ia ka jingsiew ia ka trai bad ia ka sut haba ia dei bad ka ram kaba la shim da ka sorkar jylla, ka sorkar jylla kala shim ruh ia ka lat ban shim ia ka ram na ka sorkar pdeng kaba khlem sut bad ia ka ruh yn siew ha dien 50 snem.
Ban siew ia katei ka pisa kaba T.1000 klur, na ka bynta kane ka sorkar kala thep bad ka RBI san klur shisnem bad ynda poi katei ka 50 snem da kane ka pisa la lah ban siew ia katei ka pisa kaba mut ka sorkar jylla kam siew ei ei ka la long kum ka grant.
La iathuh ba ka sorkar jylla karam kaba ka sah haduh mynta haba kheinlang baroh ka long T.20,000/- tyngka kane ka dei kaba la lang naduh mynshuwa haduh mynta bad ka sorkar kam pat juh pynkhein ia ki kyndon ban siew ia ka sut bad trai man u snem.
