Shillong, Risaw 08: Ka jingiakhih ba khlem put sngi jong ki nonghiaki skul SSA ki ba don hapoh ka shatri jong ka All Meghalaya SSA School Teachers Association (AMSSASTA) ka la kyjoh mynta ka sngi ka 8 tarik u Risaw 2024 sha ka 8 sngi kynthih.
Na ka liang ki nongialm kane ka kynhun ki la pynpaw ka jingsngew sih halor ka jingbym khot ban ia kren ki bor ba dei peit jong kane ka tnad Pule puthi jong ka sorkar Jylla ban iathir iatai halor ki mat jingdawa jongki.
Ha ka jingiakren bad ki nongthoh khubor na ka liang u General Secretary ka seng AMSSASTA u bah Wanpyndap – hi Lapang u la ong ba lada ka sorkar Jylla ka dang iai mynthi halor ka jingdawa jong ki na ka liang ka seng kin sa shim ia ki sienjam ba kham tyngeh ha kine ki khyndiat sngi ki ban sa wan tad ynda ki dkhot ki ba dei na Garo Hills ki la lah ban poi sha Shillong.
U la ongruh ba ha kine ki khyndiat sngi ba la dep na ka liang u adviser jong ka tnad Pule puthi ka Sorkar Jylla u Bah HM Shangpliang u la dep ban wan ban jngoh ia ki hynrei na ka liang jong u, u khlem lah ban ai kano kano ka jingkular hynrei ka la don tang ka jingiakren da ka ktien ban pynsngew ia kine ki jingdawa jong ki sha ka tnad ba dei khmieh. U la ong ruh ba na ka liang jong ki, ki dang ap ia ka jingkhot ia kren na ka liang ka sorkar.
Kum ban shu pynkynmaw ba ka All Meghalaya SSA School Teachers Association (AMSSASTA) ki la sdang ia kane ka jingia khih ba khlem put sngi na duh ka 1 tarik u Risaw 2024 ha madan Malki Shillong kane ka la wan ha dien ba ki la dep ban ai por ia ka sorkar Jylla ban pynurlong ia ki jingdawa jongki ka ba la kut noh ha ka 30 tarik u Nailur 2024.
