Shillong, Risaw 14 : U Myntri Sorkar Pdeng ba dei khmih ia ka tnad Jal Shakti CR Patil u la pynbna ia ka thup jong ki nongjop jong ka khusnam National Water Awards kaba san mynta ka sngi ha Shram Shakti Bhawan New Delhi.
Ki tnad Water Resources, River Development, and Ganga Rejuvenation (DoWR, RD &GR), hapoh ka tnad Jal Shakti ki la pynbna 38 ngut ki nongjop, ba kynthup ia ki nongjop lang, ia ki khusnam National Water Awards, 2023 ba 5 hapoh 9 tylli ki thup kiba long Best State, Best District, Best Village Panchayat, Best Urban Local Body, Best School or College, Best Industry, Best Water User Association, Best Institution (other than school or college), bad Best Civil Society.
Napdeng kiba jop ka long ka Khliehrangnah, kaba don ha West Jaintia Hills ha Meghalaya, kaba la jop lang ia ka kyrdan kaba lai ha ka thup Best Village Panchayat.
Ka KhliehrangnahPanchayat ka dei kaba la ioh jingithuh namar ki kam jong ka ban pynneh ia ki tyllong um, ha ryngkat ka jingpynbha biang bad ka jingkhyllie im ia 20 tylli ki tyllong um kiba kynthup 14 tylli ki wahduid bad 6 tylli ki wah rit. Ka Panchayat ka la tih ruh ia ka pung kaba 2,400 cubic meter, kaba la kyntiew ia ka um kaba don hapoh khyndew ha kane ka thain.
Kiwei kiwei ki kam kum ki jaka tuid um, ka jingthungdieng, ka jingtihia ki pung bad ka jinglum ia ka um slap ki dei kiba la pyntreikam da ka Panchayat ban kyntiew ia ka jingdon ka um hapoh khyndew. Namar ka jingdap kaum mynta, ka jaka ba lah ban rep ka long 135 ha bad kane ka la kyntiew ia ka jingpynmih ia ki mar bam.
Shuh shuh ka jingpeit kalong da ka shnong ka thaw ban pynthikna ia ka jingioh ia ka um kaba khuid, ka jingtehlakam ia ka jingkynturpudbad kinokino ki kam beain kiba ktah ia ki tyllong bad ki jaka shong um.
Shuh shuh, ki jingai jinghikai ha ka shnong ki kynthup ia ki jingleit sha kiwei kiwei ki shnong ban peit ia ki rukom treikam ha kine ki jaka bad kane ka la kyntiew ia ka jingseisoh jong ki sienjam ha kane ka shnong ban kyntiew biang ia ka jingdon ka um hapoh khyndew ha kane ka jaka.
Ha ka thup Best State, ka Odisha ka la wan ha ka kyrdan kaba nyngkong, ka Uttar Pradesh ha kaba ar bad ka Gujarat bad Puducherry ki la jop lang ia ka kyrdan kaba lai. Man ki nongjop kin ioh ia ka citation bad ka khusnam ha ryngkat ki song tyngka ha katto katne ki thup.
Ka tnad Water Resources, River Development, and Ganga Rejuvenation (DoWR, RD &GR), ka la pynbna ba ka jingsam khusnam na ka bynta ka National Water Awards kaba san kan long ha ka 22 tarik u Risaw, 2023 ha ka por 11.00 mynstep ha ka Plenary Hall, VigyanBhawan, New Delhi.
Ka President jong ka ri India, DroupadiMurmu kan long ka kongsan ha kane ka sngi. Ar ngut ki Myntri khynnah jong ka tnad Jal Shakti, Raj BhushanChowdhary bad V Somanna bad kiwei kiwei ki ophisar jong ka tnad Jal Shakti ki la iadon lang bad u Myntri haba u la ai ia kane ka jingpynbna mynta ka sngi.
Hapoh ka jingialam jong u Myntri Rangbah Duh, ka tnad Jal Shakti ka la shim ia ki sienjam ban ai jingtip shaphang ka rukom pyndonkam bad ka jingpynneh ia ka um ha kylleng ka ri.
Khnang ban ai jingtip ia ki briew shaphang ka jingkongsan jong ka um bad ban ai mynsiem ia ki briew ba kin pdiang ia ki rukom pyndonkam um ba seisoh tam, la sdang ia ka khusnam National Water Awards ba nyngkong ha u 2018 da ka DoWR, RD & GR. La ai ia ki khusnam National Water Awards ba ar, lai bad saw ha ki snem 2019, 2020 bad 2022.
Ym shym la sam ia kine ki khusnam ha u snem 2021 namar ka khlam COVID. Na ka bynta u snem 2023, ka National Water Awards kaba 5 ka la sdang ha ka 13 tarik u Risaw 2023 ha ka rynsan RashtriyaPuraskar jong ka tnad Kam Pohiing. La ioh 686 tylli ki application. La peit bniah ia kane da ka Kynhun ki Nongbishar.
Ia ka jingsakhi ia ki application la pynlong da ka Central Water Commission (CWC) bad Central Ground Water Board (CGWB). Ka National Water Awards (NWA) ka peit ia ka jingtrei bha bad ki sienjam da ki riew shimet bad ki kynhun ha kylleng ka ri ban pynurlong ia ka jingthmu ‘JalSamridh Bharat’ jong ka Sorkar.
