Shillong, Risaw 21: Ka All Meghalaya Sarva Shiksha Abhiyan School Teachers’ Association (AMSSASTA) mynta ka sngi ka 21 tarik u Risaw 2024 kala rai ban weng noh shuwa shipor ia ka jingiakhih shong kyllain mungor ka ba ki la pynlong ha madan Malki hadien ka jingkular jong ka Sorkar ban sa pynkiew noh ia ka tulop jong ki.
“Ngi la rai ban weng noh iaka jingiakhih kadei hadien ba ka Myntri Sorkar Kong Ampareen Lyngdoh kala pyntip shaka Association ba ka Sorkar kala mynjur iaka jingdawa jong ki Nonghikai SSA bad kan sa shim rai ha kine ki khyndiat bnai ban wan.”
Ong u bah Peter Thyrniang President ka AMSSATA ha dien ka jingiakynduh bad ka Dr M Ampareen Lyngdoh myntri ka tnad ka koit ka khaih bad ka ba dei ruh ka nong aiktien ka Sorkar Jylla.
U la ong ruh ba “ka Myntri kala pyntip ba ka Sorkar kam pat lah ban pynbna ia kane ka jingpynkiew tulop namar ka jingtreikam ka Model Code of Conduct (MCC) jong ka elekshon shiteng samoi ha Gambegre constituency”.
U la pyntip ruh ba ka myntri kala kren shai ba ka sorkar kam pat lah ban pyntip ba haduh katno kan kyntiew ia ka tulop bad lano yn kyntiew. “Ka Association ka ieng skhem halor ka jingdawa ban pynkiew ia ka tulop da 100 % haba buh hakhmat ba ka jingpynkiew tulop ba khatduh ka dei phra snem mysnhuwa, kata ha u snem 2016″ U la bynrap.
Ka AMSSASTA ka la pyntip ruh ba ka la rai ban pynsangeh noh ia ka Rally ka ba ki la khot ban pynlong ha ka 23 tarik u Risaw 2024. Kum ban shu pynkynmaw ka AMSSASTA ka la pynlong ia ka jingshong kyllain mungor ha madan Malki naduh ka 1 tarik Risaw, kaba la kynjoh 21 sngi mynta ka sngi ban pynbor ia ka Sorkar Jylla ba kan pynkiew noh ia ka tulop jong ki 13000 ngut ki nonghikai SSA da 100%.
