Shillong, Risaw 21: Ka Hynniewtrep Integrated Territorial Organization (HITO) sengkmie ha ka jingialam khmat u president bah Donbok Dkhar ka la leit ban buh da ki katto katne ki jingujor ki ba kongsan sha ki lai tylli ki tnad, kata sha Meghalaya Human Rights Commission (MHRC), sha ka Ophis DGP, bad ruh sha u Chief Secretary ka sorkar jylla u bah DP. Wahlang.
Kane ka jingleit buh jingujor ka seng kidei ha ka ba iadei bad ka jingjia kaba la jia ha Wahiajer, East Jaiñtia Hills District, myn ha ka 18 tarik Risaw 2024,ka ba la mih ka huri hura hapdeng ka jingialang sngap paidbah lane ka public hearing ba la khot da ka Meghalaya State Pollution Control Board (MSPCB) halor ka jingpan jingbit ka MS Meghatop Cement Pvt Limited.
“Ka jingleit buh jingujor sha ka Meghalaya Human Right Commission (MHRC) kadei ba ki nongshong shnong ba shisha kiba shah khanglad bad la khang pyrshah ïa ki ban ïashim bynta ha katei ka jingialang sngap paidbah bad pynsngew ia ka jingpyrshah”. Ong u bah Donbok president ka HITO.
U la ong ruh ba wat hapdeng ka jinglong jingman kaba la nang jur bad ki nongshong shnong jong katei ka shnong ki la shah khanglad, ha ki bor synshar shnong bad ki Pulit, ha ka ba khlem da shim kano kano ka sienjam na ka bynta ban tuklar lane ban pynshongsuk shongsain.
“Halor ka jingshah khang lad bad shah leh donbor ia ki nongshong shnong jong katei ka shnong ha ki briew ki ba bat ia ki dieng, na ka liang ka seng ka la leit ban buh da ka jingujor sha ka Human Right Commission bad ruh sha ka DGP ba kidei ban pynshitom ia kito ki briew ki ba khanglad ia ki nong shnong shnong ban leit sha katei ka public hearing katkum ki kyndon jong ka aiñ” u la ong.
Ha kane ka jingleit buh jingujor, ka seng ka la leit buh jingujor pyrshah ia u Deputy Commissioner ka EJHD, ia u Superintendent of Police EJHD ia ki rangbah shnong bad kumjuh ruh ia ka Meghatop cement Pvt limited.
Ha ka ba iadei pat bad ka jingleit buh jingujor ka seng sha u Chief Secretary u bah DP. Wahlang, ka long ban dawa ba dei ban suspension ia kito ki heh ophisar ki ba don ha katei ka sngi bad kumjuh ruh ia ki ba dei peit ia ka East Jaintia Hills District.
“Ha katei ka sngi kam shem la don shuh kata ka jingjai jai hynrei la shu niom beain da ki briew ki bym dei na katei ka shnong bad ka shu khanglad ia ka hok u paidbah. Kumta ka seng kan nym shongklikti hynrei kan nang iai buddien ia kane ka kam” pynkut u bah Donbok.
