Shillong, Risaw 25: Ka jingai jingmynjur u Lat ka Jylla ban pynlong ain iaka The Khasi Hills Autonomous District (Administration of Elaka) (Amendment) Bill 2023, kan nang pynkhlain bad pynkupbor iaki bor shnong ha man la ki shnong ki thaw kiba hap haka jingkhmih jong ka Khasi Hills Autonomous District Council (KHADC).
“Ka jingai jingmynjur u Lat ka Jylla iaka KHAD (Administration of Elaka) (Amendment) Bill, 2023, ka bala long ain mynta, kan pynklain iaka jingpyrkhing iaki nongsah wai ha kylleng ki shnong kiba hap hapoh u pud u sam ka Council bad kan pynkupbor daka ain ym tang iaki Dorbar Shnong hynrei wat iaki Seng Samla, Seng Kynthei bad ki Seng Longkmie” Ong u CEM ka KHADC u bah Pyniaid Sing Syiem ha ka jingia kynduh bad ki nongthoh khubor.
U Bah Pyniaid u la ong “ka jingioh jingithuh daka ain iaki Seng Samla, Seng Kynthei ne Seng Longkmie kan iarap iaki Dorbar Shnong ban peitngor iaka jinglong jingman ki shnong ki thaw, la kadei ban tem iaki jingiakulmar ne ban tem iaka kam khaii drok kaba la jyllei bha mynta”.
U la ong ruh ba ka KHAD (Administration of Elaka) (Amendment) Act, 2023, ka don iaki kyndon ha kaba ki Dorbar Shnong ki hap ban shim kyrteng ia baroh (La ki dei ki Khasi na kiwei ki District ne ki bar Jylla, ne ki bar Ri) kiba wan sah wai ha man la ki shnong.
“Ka KHAD (Administration of Elaka) (Amendment) Bill, 2023, kan nym iatyngkhuh satia bad ka Meghalaya Residents Safety and Security Act (MRSSA) ba pyntreikam daka Sorkar Jylla, kaba don ruh ki juh ki kyndon ban shim kyrteng iaki ba wan sah wai” pyntip u CEM.
“Ngam don eiei ban ong halor ka MRSSA hynrei ngi (KHADC) ka leh iala ka jong ka bynta namar ka jingpyniaid iaki shnong ki thaw (Administration of Village Dorbar) ka hap haka jingkhmih jong ka KHADC. Ka KHADC kan leh iala ka jong ka bynta, ka Sorkar Jylla kan leh iaka jong ka bynta bad nga ngeit kane kan nang pynkhlain shuh shuh iaki Bor Shnong” u la ong.
