Shillong, Naiwieng 04: Ki dkhot jong ka seng All Khasi Hills A’chik Federation (AKHAF) kala pynlong ia ka jingiakhih ha Maheshkhola ha South West Khasi Hills District ban dawa na ka sorkar ban shna pynbha ia ka surok na Maheshkhola sha Amarsang.
Ia kane ka jingiakhih kila pynlong ha ka sngi Saitjain ka 2/11/2024 bad ha kane ka jingiakhih kila dawa ruh na ka sorkar pdeng lyngba ka National Highway ban shna ia ka surok na Shallang jong ka West Khasi Hills District sha Maheskhola kaba hap hapoh jong ka South West Khasi Hills District kane ka surok kan iarap ia ki paidbah katei kathain.
Ki nongialam seng AKHAF kila pynpoaw ruh ia ka jingsngew diaw ban ioh ba ka surok na Maheskhola sha Amarsang kaba dei jong ka PMGSY kala sniew sha ba palat kane kala buh ia ki paidbah ha ka jingeh ha ka leit ka wan.
Ka seng ka kynnoh ba ka jingsiew jong ka surok ka dei ka jingtrei torti jong u kontraktor kaba dei na Maheskhola sha Amarsang ha kine ki snem kiba la dep, ha ka juh ka por la dawa ba dei ban thung ia ka kynhun tohkit ha kaba ia dei bad ka jingshna ia katei ka surok.
Ha kane ka jingiakhih kiba la wan ban ia shim bynta ym dei tang ki dkhot ka seng hynrei ki paidbah nongshnong shnong katei ka thain kaba hap ha South West Khasi Hills District ban pynpaw sha ka sorkar ia ka jingsniew ka surok.
