Shillong, Naiwieng 08: Ka kynhun jong ki nonghikai ka skulbah NEHU kiba hapoh ka shatri jong ka North Eastern Hills University Teacher’s Association bad ki nonghikai jong ka Meghalaya Tribal Teacher’s Association mynta ha ka 8 tarik u Naiwieng 2024, ki la leit ban ia kynduh ia u Lat jylla u C H Vijayashankar na ka bynta ban pynpaw ha u halor ka jing sngap mynthi u Vice Chancellor ka skulbah NEHU U Prof Prabha Shankar Shukla.
Katta ka jingsngap mynthi ka dei halor ki mat jingdawa jong ki samla pule ka skulbah NEHU ba la ialam da ka NEHUSU bad ka KSU NEHU Unit na ka bynta ban wengkam ia u Registrar bad Deputy Registrar kiba u VC u la thungkam beain bad kumjuh ruh ban thung ia 2 ngut ki Pro vice chancellor ha ar tylli lki Campus jong ka NEHU kiba don ha Shillong bad Tura.
Haba ia kren bad ki lad pathai khubor hadien ka jingiakynduh ia u lat ka jylla na ka liang U President ka NEHUTA u Prof. Lakhon Kma u la iathuh ba na ka liang u Lat u la pynpaw ia ka jingsngewkhia ha kaba ia dei bad ka jinglong jingman ha ka skulbah NEHU.
kata ka long ha kaba ki samla pule ka skulbah ki hap ban shong shah thngan ba khlem buh por ia kaba la sdang naduh ka 5 tarik u Naiwieng 2024 bad na ka liang u Lat u la bthah ruh ia ki nonghikai ba kin wanrah ia ki jingai jingmut bad ki jubab na ka bynta ban weng ia kane ka kynrum kynram hapoh kane ka skulbah.
U Prof. Lakhon ula ther ruh ia u VC da kaba ong ba u don por ban leit ai jingkren sha Shillong Press Club katba tang shi kyntien um patiaw ban kylli ia ka jinglong jingman jong ki khynnah kiba la pynlong ia ka jingiakhih ha phyllaw ka ophis treikam jong u VC.
