Shillong, Naiwieng 12: Mynta ka sngi u bah Baitlang Pohsngap u la pynbna ban ia khun ia ka MDC elekshon sha ka iing dorbar jong ka Jaintia Hills Autonomous District Council kum u kyrtong shimet na South Jowai MDC Konstitwensi ha dien ba la duh ia ka tiket na ka Party VPP.
Haba kren ha ki lat pathai khubor mynta ka sngi ha Shillong Press Club u la ong ba ymd on ei ei ban ong ia ki bor bahalor jong ka party ha kaba ki pynduh tiket ia u, hynrei kane ka jingduh tiket kam dei ka jingduh jingkyrmen, hynrei ka dei ka jingsdang jong ka jingialeh namar dei u paidbah ban rai.
La ong ba u la don ha ka party VPP namar u dei u briew ba kren ia ka jingshah bad pyrshah ia ka bor pisa bad u la ong ba ka bamsap ka dei ha ka por ba ki paidbah ki shim ia ka pisa na ki kyrtong kata ka dei ka jingsdang jong ka bamsap kaba u la juh pyrshah jur.
Ha kane ka sngi u la ong ba lada ki paidbah jong ka South Jowai MDC Konstitwensi ki ai ka jingshaniah ha u u long ba la kloi ban kit ia kane ka lyngkor kum u nongmih khmat jong ki, u la ong ba ia ka mynsiem ban shakri ia ki paidbah yn nym lah ban khang.
Ha ka ka por u la ong haba u la kylli na ki ba bun ba lang hato ka party VPP kala jurip ne em shuwa ban ai tiket, u la ong ba ym shym ioh sngew ban ong ba kala don kata ka jingtohkit ne wat jingtip na ka party, mynta ka sngi u la pynbna ba un ia khun ia ka MDC elekshon sha ka iing dorbar jong ka JHADC.
